Күрделі жөндеу жұмыстары кезең-кезеңімен жүзеге асырылуда

Түбек теміржолында биыл қырық шақырымға жуық жол күрделі жөндеуден өтеді. Маңғыстау магистральдық желі бөлімшесі бойынша жоспарланған бұл құрылыс жұмыстарының қазір қызған кезі. Жаздың әрбір қолайлы күнін тиімді пайдаланып қалуды ойлаған жолшылар негізгі жөндеу жұмыстарын осы маусым айында бітіруді межелеп отыр.    

Жалпы, осы жылы НЖС-14 Маңғыстау магистральдық желі бөлімшесі бойынша 38,8 шақырым темір жолға күрделі жөндеу жасалып, толықтай жаңартылады.  Бүгінде ауқымды жұмыстар легі кезең-кезеңімен жүзеге асырылуда. Күрделі жөндеудің отыз шақырымы Маңғыстау жол дистанциясы аумағында, қалғаны Бейнеу теміржолына қарайды. Тарқатып кетсек, ПЧ-12 Бейнеудің №2-3 бекеттер перегонында 5 шақырым жол жөнделеді, ол 50-55-ші шақырымдар аралығын  қамтиды. Шілденің ішінде басталған бұл жұмыс айдың аяғына қарай аяқталады деп жоспарланған. Құрылыс жұмыстарын «ПМС Астана» мекемесі атқарып жатыр. Жөндеуге техникамен қатар жүзден астам адам қатысуда. Жинақтаушы кран, орналастырушы кран, қиыршық тасты жеткізіп, жолға төсейтін вагондар, шпалдың астын нығыздайтын, жылжытатын «ВПО», «ЭЛБ» техникалары, 5 трактор және 140 жол жондеуші осы шаруаларды ширатып, жолды жаңартуға жұмылдырылған.  

Бұдан бөлек Бейнеу жол дистанциясы бойынша тағы да екінші күрделі жұмыс күтіп тұр. Бейнеу станциясы мен №460 бекет перегоны аралығында 3,8 шақырымдық жолдың жөндеу жұмысы да осы жаздың еншісінде.  

Жоғарыда айтқанымыздай, биылғы жол жөндеу жұмыстарының басым бөлігі  Маңғыстау жол дистанциясына тиесілі. Жұмысты алдағы тамыз айында бастау жоспарланған, яғни №9-Маната-№10 бекеттер арасындағы темір жолдың отыз шақырымы жаңа үлгідегі құрылыс материалдарына ауыстырылып, жол сапасы артатын болады. Жолға ұзындығы 725 метрлік рельстер төселіп, ескі шпалдар орнына темірбетонды шпалдар салынады.  

– Қазір ең бастысы қозғалыс қауіпсіздігін сақтап, осы аталған жұмыстарды уақытылы атқарып, жолдың сапасын арттыру, іс-шаралардың кезең-кезеңімен жүзеге асуы бақылануда. Жөндеу жұмыстары біткен соң біздің бөлімшеге қарасты темір жол жағдайының сапасы жоғарылап, жүк және жолаушы пойыздарының жылдамдығы да артатын болады, – дейді Маңғыстау магистральдық желі бөлімшесінің жетекші инженері Ерлан Аманжолов.