Ақтөбеде күрделі жол жөндеу жұмыстарының 70 пайызы аяқталды
"Қазақстан теміржолшысы" газетінің Жамбыл облысындағы меншікті тілшісі
«ҚТЖ» ҰК» АҚ Ақтөбе магистральдық желі бөлімшесі аумағында биыл төрт участоктың жолы жаңарады. Бүгінгі таңда аймақта күрделі жол жөндеу жұмыстарының 70 пайызға жуығы аяқталды.
Жоспар бойынша бөлімше биыл Қарауылкелді-Мақат және Жарлы-202 разъезі-Ноғайты аралығындағы 77,862 шақырымға жуық темір жолға толықтай күрделі жөндеу жұмыстарын жүргізеді. Бүгінде 202 рзд. – Ноғайты, 202 рзд. – Жарлы бекеттерінде жасалып жатқан жұмыс толықтай бітті. Қазіргі уақытта Үйтас-Құдықсай аралығында жұмыстар жүріп жатыр.
Ақтөбе жол дистанциясында 4,8 шақырымда шпал ауыстыру жұмыстары толық аяқталды. Бұл жерде қиыршық тас пен жаңа бекіту түрімен шпал ауыстырылды.
Сонымен қатар Шалқар дистанциясында жаңа жол төсемі салынып жатыр. Шалқар-Тассай аралығына кезінде 25 м қысқа рельс салынған. Сол тұстағы рельстер ұзартылады. Қазір 15,9 шақырым ауысты, жоспар – 40 шақырым.
Кестеге сай бекітілген жол жөндеу жұмыстарының бәрі арнайы техниканы қолдана отырып жүргізіледі. Аймақта күрделі жөндеу жұмыстары сәуір айының ортасынан басталды. Қараша айында толық аяқталады деп жоспарланып отыр.
«Құрылысқа пайдаланылатын материалдың барлығы – отандық өнім. Күрделі жөндеуден кейін жылдамдық 60 шқ/сағаттан 90 шқ/сағатқа дейін көтеріледі. Яғни жылдамдық көтерілсе, жұмыс өнімділігі, тасымал көлемі артып, қай жағынан да тиімді де үнемді болмақ», – деді Ақтөбе магистральдық желі бөлімшесі жол бөлімінің бастығы Бауыржан Хамзин.
Күрделі жаңартудан басқа Ақтөбе магистральдық желі бөлімшесі орташа жөндеу жұмыстарын да күшейтті. Күрделі жөндеу жүріп жатқан жерден шыққан жарамды материалдар станциядағы жөнелту жолдарын жаңартуға төселіп жатыр. Мәселен, Бершүгір, Қандыағаш, Никельтау, Ақтөбе станциялық жолдарға пайдаланылуда. Бұл күнделікті күтім жұмыстары үшін де маңызды. Ескірген жолдардың сапасын төмендетпеу үшін ақаулы рельстер мен шпалдарды ауыстыру қажет болған жағдайлар болады. Яғни күрделі жөндеу жұмыстары жүрген аумақтан шыққан жарамды материалдар арқылы басқа жолдардың пайдалану ұзақтығын арттыру – үнемді де тиімді тәсіл.
Бүгінгі таңда Никельтау станциясында да осы тәсілмен орташа жөндеу жұмыстары жүріп жатыр. Онда шпал ауыстырылып, бұрмалар жөнделеді. Орташа жөндеу жұмыстарын жол дистанцияларының жолшылары өз күштерімен атқаруда.