Қызылордада күрделі жөндеу мәресіне жетті

Қызылорда магистральдық желі бөлімшесі биылға жоспарланған жолды күрделі жөндеуді толығымен аяқтады деуге болады. Ағымдағы жылы 43,16 шақырымдық аумаққа есептелінген күрделі жөндеу жұмыстары белгіленген кестеге сай ерте көктемде басталып, бүгінге дейін жалғасты.

Күрделі жөндеуді жүргізген бас мердігер компания «Integra Construction KZ» серіктестігі «Батыс» дирекциясы екі дистанция телімдерінде жүз пайызға жаңарған жол телімдерін қыркүйектің алғашқы он күндігінде тапсыратын болады.  

Олар наурыз айынан бастап Қызылорда жол дистанциясының Аққұм-Талап учаскесінде 4,84 км, Ақмая мен Екпінді бекеттерінің арасында 7,03 км, 20 бекет-Шиелі станциялары арасында 2,7 км жолды толықтай жаңартты. Ал мамыр айында Қараөзек-Қызылорда-Белкөл учаскесінде 9,36 км аумаққа күрделі жөндеу жұмыстары жүргізілді. Бұдан кейін Қазалы жол дистанциясының Қамыстыбас-Бекбауыл станциялары арасында 19,31 шақырым жол жаңа темірбетонды шпалдармен ұзындығы 1500 метрлік шойын рельстерге ауыстырылды.  

– «Integra Construction KZ» ЖШС филиалы «Батыс» дирекциясының 2024 жылдың жоспары бойынша Қызылорда облысында 43,16 шақырым жолға күрделі жөндеу жұмыстары аяқталуға жақындады, бір апта көлемінде толығымен бітеді. Күрделі жөндеу кезінде барлық жұмысты ұйымдастыру жауапкершілігі филиалдың жол машина станциясының директоры Әмірхан Жолдасбай мен прораб Берік Арықбайға жүктелді. Бұған дейін талай сыннан сүрінбей өткен әріптестерім бұл жолы да сенімнен шығып, жеке құрамды орнымен жұмысқа жұмылдырып, күрделі жөндеуді дер кезінде сапалы аяқтап отыр. Күрделі жөндеу кезінде берілген толаскездер тиімді пайдаланылып, жұмысқа 45 жол жөндеуші мен 20 дана қиыршық тас таситын және рельс-шпалды решетканы таситын жылжымалы құрамдар, 5 бульдозер, 2 автогрейдер, 5 автокөлік бірліктері қатыстырылды. Рельстер төселгеннен кейін жаңа жолдарды технологиялық талап деңгейінде бабына келтіру үшін МПД, ПЛ, УК, ЭЛБ, ВПО секілді ауыр жол техникалары жұмысқа жегілген, – деді «Integra Construction KZ» басшысы Дәурен Сұлтамұратов.