Қар тазалайтын техникалар сақадай сай тұр
«Қазақстан теміржолшысы» газетінің тілшісі
Магистральдық желі дирекциясының филиалдары «2024-2025 жылдардың қыс маусымына шаруашылықтар мен кадрларды дайындау жоспары» аясында ауқымды жұмыстар атқарды.
Мәселен, биыл 2229 ғимарат пен 18,2 км жылу трассасы жөндеуден өтіп, алдағы қатал маусымда қалтқысыз қызмет етуге 270 астам қар жинайтын және қар тазалайтын техника дайындықтан өтіп, бүгінде жұмыс істеуге сақадай сай тұр. Сонымен қатар биыл алғашқы «қыстаушылар» мен киімдері тозған сала еңбеккерлері арнайы қыстық киімдермен және аяқ киімдермен қамтамасыз етілді. Бұдан бөлек, станцияларда, разъездерде және басып озу пункттерінде тұрып жатқан теміржолшылар мен зейнеткерлерге 12 мың тоннадан астам тұрмыстық көмір жеткізіліп берді. Мамандардың айтуынша, бұл жоспар шеңберіндегі іс-шаралар легі жалғасуда екен.
Айта кетерлігі, өткен қазан айының ортасында қыс кезеңі алды емтиханы іспеттес күзгі комиссиялық байқау мәресіне жеткен болатын. Осы байқау барысында да инфрақұрылымдық нысандардың, жылжымалы құрамдардың, арнайы техникалардың, өндірістік-техникалық нысандардың, техникалық құралдардың ағымдық жай-күйі тексеріліп, оның барысында анықталған кемшіліктер деңгейіне қарай жойылып, ал бірқатарын жоюға ескертулер берілген.