Қуат көздері жаңартылуда

Қызылорда белгі беру және байланыс дистанциясының Қараиірім, Қызылтам, Сұлутөбе станциялары телімдеріндегі ескі дизель-генераторлар заманауи BL маркалы генераторлармен ауыстырылуда.  

Белгі беру және байланыс құрылғыларын электр қуатымен жабдықтау жүйелерінің тұрақты жұмыс істеуі пойыз қозғалысының қауіпсіздігі мен тиімділігін қамтамасыз етеді. Қызылорда белгі беру және байланыс дистанциясы бұл бағытта маңызды қадам жасап, ескі дизель-генератор агрегаттарын (ДГА) заманауи BL маркалы микропроцессорлық дизель-генераторлармен ауыстыруды қолға алды. Дистанциядағы қуат көздерін монтаждау, жаңарту жұмысының басы-қасында жүрген өндірістік бөлім басшысы Нұрлан Жәнібеков жағымды жаңалықтар жоспарлы жұмыстар негізінде атқарылып жатқанын білдірді.

— Ескі дизель-генераторлар төмен өнімділік, жоғары отын шығыны және экологиялық талаптарға сай келмейтін зиянды қалдықтардың көп мөлшерде бөлінуі байқалатын. Сонымен қатар олардың сенімділігі төмен болғандықтан, жөндеу мен техникалық қызмет көрсету жиілігі артып, қосымша шығындарға әкелді. Ал мына заманауи BL маркалы дизель-генераторлардың артықшылықтары орасан зор. Мәселен, әр телімде жиырмаға жуық реленің, он шақты ОРс типті аккумулятор пайдаланылмай жұмысы қысқарады, жанармай шығыны айтарлықтай азаяды, бұл ұзақ мерзімді перспективада экономикалық тиімділікті арттырады. Микропроцессорлық басқару жүйесі автоматты іске қосу, тоқтату және ақауларды анықтау мүмкіндігін қамтамасыз етеді. BL генераторлары халықаралық экологиялық стандарттарға сай келіп, зиянды қалдықтардың бөлінуін азайтады. Қызмет көрсету жеңілдігі: озық технологиялық шешімдердің арқасында техникалық қызмет көрсету уақыты мен шығындары азаяды. Жоғары сапалы компоненттері мен заманауи технологиялары арқасында үздіксіз және тұрақты жұмыс істеуге мүмкіндік береді, - дейді бөлім басшысы Нұрлан Жәнібеков.

Әбдірахман Сырғабаев басқаратын дистанцияда өз ісінің шеберлері жеткілікті, сондықтан жұмыс сапасына сын жоқ. Осынау тиімді, сенімді агрегатты іске қосып жатқан электормеханиктер Мақсұтхан Мырзаханұлы, Қыдырбай Бексарыұлы, аға электромеханиктер Бати Ақберген және Сәбит Омашевтің еңбегі ерекше атап өтуге тұрарлық. Ескі дизель-генераторларды заманауи BL маркалы генераторлармен ауыстыру — бұл теміржол саласындағы инновациялық қадам. Бұл шешім тек энергия тиімділігін арттырып қана қоймай, қызмет көрсету сапасын жақсартып, экологиялық талаптарға сай болуды қамтамасыз етеді. Дистанциялықтардың бұл тәжірибесі өзгелерге үлгі бола алады.