Маңғыстау теміржолында ауқымды жұмыс атқарылды

Күрделі климаттық жағдайда орналасқан Маңғыстау магистральдық желі бөлімшесінде инфрақұрылымдарды жаңғыртып, өткізу қабілеті мен жол қауіпсіздігін арттыру мақсатында ілкімді істер жүзеге асырылуда. Былтыр Маңғыстау теміржолында қырық шақырымға жуық темір жол күрделі жөндеуден өткізіліп, жүз қырық шақырымнан астам жерге малға қарсы қоршау орнатылған. Сонымен қатар жұмысшыларды тасымалдауға тоғыз автокөлік алынған.

Аталған жұмыстар биыл да жалғасын таба ма, осы жылы Маңғыстау магистральдық желі бөлімшесі бойынша қандай жаңалықтар болады деген сауалмен бөлімшенің «есігін қаққан» едік...  

Маңғыстау магистральдық желі бөлімшесі жол бөлімінің бастығы Нұрлыбай Қисаевтың мәліметінше, 2024 жылы 38,851 км жолға жөндеу жүргізсе, 1400 шаршы метр ақауы бар жер ретке келтіріліп, 17 жиынтық бағыттамалық бұрма ауыстырылған. Станциялық жолдардың 2,645 шақырымы темірбетонды шпалдармен нығайтылған.  

Жолға мал шығуының алдын алу бағытында 145,5 км қоршау салынған. Жұмысшылардың еңбек жағдайларын жақсарту үшін 20 модульдік ғимарат қолданысқа берілген. Түрлі типтегі 24 ғимаратқа жөндеу жасалса, Сай-Өтес станциясы бойынша пилоттық жоба аясында барлық жағдайы бар дрезина тұрағына арналған модульдік автогараж және гараж салынған. Бұл объект жұмысшыларды жұмыс орнына және темір жол арқылы кері тасымалдауға арналған дрезина мен автомотрис тұрағына арналған. Биыл жаңадан 8 дана модульдік типтегі гараж орнату жоспарланған.  

Маңғыстау станциясындағы теміржол вокзалының жобалау-сметалық құжаттамасы жасақталған. Бейнеу, Жаңаөзен, Болашақ станцияларында вокзалдар ағымдағы жөндеуден өткен. Автопарк жаңартылып, жұмысшыларды тасымалдауға 9 бірлік автокөлік алынған. Жолшылардың жылыну пункттеріне ағымдағы жөндеу жүргізіліп, 130 контейнер жылу пункттеріне айналдырылған.

– Былтыр темір жолда мал басу оқиғасы жиілеп кетті. Соған баса назар аударып, қоршау салу жұмыстарын жандандырдық. Жолдан шыққан шпалдарды кәдеге жаратып, шпал мен төрт қатар сым тартып, мал өте алмайтын 145,5 км қоршауды өз күшімізбен тұрғыздық. Биыл тағы да 87 км салу жоспарда бар, Сай-Өтес-№7-Бекет, Тұрыш-Сорша, Сорша-Жарқын станциялары арасын қоршаймыз. Яғни Бейнеу жол дистанциясы бойынша 34 шақырым теміржол аумағы қоршалады. Ал Маңғыстау дистанциясы аумағында №15-16, 11-12 бекеттер мен Жетібай-Жаңаөзен станцияларының арасына барлығы 53 шақырым жолға қоршау салынады.  

Былтыр күрделі жөндеу №2-3 бекеті аралығында 5,028 км, Бейнеу ст.-№460 бекеттер бойынша 3,803 км, №9-Маната-10 бекеттерінің аралығында 30,020 км жолға жүргізілді. Аз ғана аумақтағы ақауы бар жер төсемі немесе жаңбыр жауғаннан кейін балшық болып иленіп, кедергі келтіретін территорияға геотекстиль материалы салынып, нығайтылды. Жергілікті құрылыс бригадасының көмегімен ПЧ-12 Бейнеу бойынша 16, ал ПЧ-13 Маңғыстауда 12 нысанға ағымдық жөндеу жасалынды. Биылғы жылы тағы 13 объект жоспарда бар. Оның сегізі Бейнеу жол дистанциясына, бесеуі Маңғыстау жол дистанциясына тиесілі, сондай-ақ алдағы уақытта Сай-Өтес-№7 бекет аралығындағы 15,7 км жол күрделі жөндеуден өтеді, – деп ақпар берді жол бөлімінің бастығы.