Жаңа өткел қосыны ашылды
Қызылорда облысы бойынша меншікті тілші
Қызылорда магистральдық желі бөлімшесінде теміржол өткелдері мен жол-көлік қозғалысының қауіпсіздігін арттыруға бағытталған маңызды шаралар жүзеге асырылып жатыр.
Бұл бағыттағы кезекті қадам Қызылорда жол дистанциясының Бәйгеқұм-20 бекет аралығында жаңа өткел қосынының ашылуы болды. Теміржол өткелдеріндегі кешенді жұмыстар аймақтағы жол-көлік қозғалысының қауіпсіздігін қамтамасыз етіп, қозғалыс қатысушыларына қолайлы жағдай туғызуды көздейді. Бұл өз кезегінде тұрғындардың қауіпсіздігі мен теміржол инфрақұрылымының сапасын арттыруға үлес қосады.
Қызылорда жол дистанциясының басшысы Марат Оңалов бұл жоба тек өткел кезекшілерінің жұмысын жеңілдетіп қана қоймай, өткел аймағындағы қауіпсіздікті күшейтуге бағытталғанын атап өтті.
– Біз өткел кезекшілерінің жайлы әрі қауіпсіз жағдайда жұмыс істеуін қамтамасыз етуді басты назарға алдық. Жаңа өткел қосынына заманауи бақылау құралдары, бейнебақылау жүйелері және байланыс қондырғылары орнатылды. Бұл тек теміржол қызметкерлері үшін ғана емес, аймақтағы көлік жүргізушілері мен жаяу жүргіншілер үшін де үлкен маңызға ие, – деді Марат Оңалов.
Өткелде кезекшілердің жұмысын тиімді ұйымдастыруға арналған заманауи құрал-жабдықтар мен бейнебақылау және қозғалысты басқару технологияларының енгізілуінен бөлек, қыста жылытып, жазда салқындататын желдету жүйелерімен қамтылуы секілді бірнеше маңызды артықшылықтармен ерекшеленеді. Өткелде кезекшілік ететін Ербол Нұртазаев, Рахат Әбенов, Еділбай Сегізбаев және Нұржан Тұрманов оның игілігін көріп отыр. Бөлімшедегі өткелдерді заманауи кейіпке келтіру бастамасы Қызылорда өңірінде өткел қауіпсіздігін арттыруға бағытталған жүйелі бағдарламаның бір бөлігі болып табылады.