Инфрақұрылымдық жобаларды дамыту міндеттелді

Абай облысына арнайы жұмыс сапарымен келген ҚР Премьер-министрі жергілікті активке аймақтың жаңа әкімі Берік Уәлиді таныстыру барысында өңір басшылығы алдына ел Президенті жүктеген бірқатар міндеттерді атап өтті.

Соның ішінде инвестициялық ахуалды жақсартуға баса назар аудара отырып, аймақтағы көлік транзитін, жаңа инфрақұрылымдық жобаларды дамыту керектігін сөз етті. Атап айтсақ, Абай облысы Ресей және Қытаймен шектеседі, халықаралық транзиттік сауда торабы саналады, сондықтан да аймақ қолда бар транзиттік әлеуетті барынша пайдалануы қажет. Осы орайда қазірден бастап Аягөз – Тачэн бағытындағы теміржол желісі және «Бақты» кеден бекетіндегі құрғақ порт құрылысы бойынша маңызды инфрақұрылымдық жобаларды іске асыру мәселелерін бақылауда ұстау тапсырылды.  

Өңірдің маңызды инфрақұрылымдық жобасының бірі Бақты – Аягөз аралығындағы Қазақстан – Қытай үшінші шекаралық теміржол өткелінің құрылысы екені белгілі. Мемлекет басшысының Жолдауы аясында басталған бұл жоба бірінші кезекте көлік инфрақұрылымын жақсартуға және халықаралық сауда дәлізін кеңейтуге бағытталған. Жобаны іске асыру үшін Абай облысының әкімдігі ауданы 10 506,3 га жер учаскесін арнайы резервке қойды. Оның 5 911,7 га мемлекеттік меншікте болса, 4 594,6 га жеке меншік иелеріне тиесілі. Жер телімдері Аягөз, Үржар, Мақаншы аудандарының әкімшілік шекараларында 5 жыл мерзімге сақталады. Бұл шаралардың сыртында Семей ЖТ бөлімшесі басшылығы арнайы мамандармен бірге құрылыс салынатын телімдерді толық зерттеп шыққан болатын.  

Құрылыстың бастапқы кезеңінде жергілікті тұрғындар арасынан жұмыс күшін тарту жоспарлануда. Ал жобаны пайдалану кезеңінде түрлі кәсіп мамандары үшін 1 800-ге жуық жұмыс орны құрылатын болады. Аталған нысандарды 2027 жылы пайдалануға беру күтілуде.