Қарағанды-Сұрыптау станциясы жаңғыртылады

Биыл Қарағанды-Сұрыптау станциясын жаңғырту бойынша жұмыс басталады. Ол станциялардың өңдеу қуатын арттыру үшін өткен жылы бекітілген Сұрыптау жүйелерін дамыту бағдарламасы аясында жүзеге асырылмақ.  

Сондай-ақ өткен жылы электрмен жабдықтауды дамытудың 2029 жылға дейінгі бағдарламасы бекітілді. Онда 2025 жылдан бастап іске асырыла бастайтын тартымдық қосалқы стансаларды жаңғырту мен әуе байланыс желілері және пайдалану мерзімі өтіп кеткен электрмен жабдықтау құрылғыларын күрделі жөндеуден өткізу қарастырылған.  

Сонымен қатар биыл Қызылжар – Сексеуіл, Қандыағаш – Тобыл, Никелтау – Әлімбет және Ақсу-1 – Дегелең – Жаңасемей, Шалқар – Бейнеу телімдерінде автоблоктау, ал Бейнеу – Маңғыстау телімін жаңғырту жоспарланған. Бұдан бөлек, Алтынкөл – Жетіген теміржол телімі 12 жыл бойы пайдалану барысында тәулігіне 18 жұп пойыз қабылдауына байланысты, өзінің өткізу қабілетінің қорын толық пайдаланып болды, сол себептен оны жаңғырту туралы шешім қабылданып отыр. Бұл жобалардың жүзеге асырылуы телімнің өткізу қабілетін тәулігіне 30 жұп пойызға дейін арттырып қана қоймай, Қазақстанның транзиттік-көлік әлеуетін де көтере түспек.  

Сала мамандарының сөзіне сүйенсек, магистраль инфрақұрылымының өткізу қабілетін тежеп отырған негізгі фактордың бірі, станциялардың өткізу қабілеті мен қабылдап-жөнелту жолдарының пайдалы ұзындығы болып отыр. Егер қазіргі тартқыш түрлері мен контейнерлік пойыздар үлесінің ұлғаюымен пойыздардың салмағы мен құрамдар ұзындығының артқанын ескерсек, онда станция шаруашылығының бұрынғы күйде қалып, ұзынқұрамды пойыздарды өткізуге қабілетсіз болып отырғанын айта кеткен жөн. Бұл көрсеткіш жалпы алғанда станциялар мен разъездердің 59% тән жағдай. Сондықтан 2029 жылға дейін 200-ге жуық станса мен жекелеген пункттерді, соның ішінде биыл 31-ші станцияны дамыту жоспарлануда. Жеке пункттерді дамыту қазірдің өзінде типтік жобалар бойынша жүзеге асырылуда, бұл жобалық шешімдерді дайындау уақытын 6 айға дейін қысқартып отыр.