Елімізде 125 теміржол вокзалын ауқымды жаңғырту жұмыстары басталды – премьер-министр
Кеше Үкімет отырысында Премьер-министр Олжас Бектенов туристік дестинациялардың инфрақұрылымын дамыту және оларды қолжетімді ету жөніндегі кешенді жұмыстың маңыздылығын атап өтті, деп хабарлайды Rail-news.kz.
Оның айтуынша, өткен жылы Ұлы Жібек жолының бойымен өтетін «Жібек жолы» туристік пойызы іске қосылды. 125 теміржол вокзалын ауқымды жаңғырту жұмыстары басталды. Алматы, Шымкент және Қызылорда қалаларында әуежайлардың жаңа терминалдары салынды.
«Көші-қон рәсімдерін оңайлату шаралары қолға алынды. Мәселен, шекара бекеттерінде ұйымдасқан туристік топтарды кезексіз өткізу бойынша пилоттық жоба іске қосылды. Бұл шара паспорттық бақылаудан өту уақытын 5 есеге қысқартуға мүмкіндік берді»,— деді Олжас Бектенов.
Премьер-министр өңір әкімдеріне туристік объектілерді қажетті инфрақұрылыммен қамтамасыз ету жұмысын жандандыруды тапсырды.