Достық-Мойынты учаскесінде 90 көпір орнатылды
Достықтан Мойынтыға дейінгі теміржол учаскесінде екінші жол салу – Қытай бағытында қазақстандық экспорт пен транзит үшін қосымша мүмкіндіктер ашатын елдің маңызды инфрақұрылымдық жобаларының бірі. Бүгінгі таңда негізгі жұмыстар 90% орындалды, деп хабарлайды Rail-news.kz.
Жасанды құрылыстарды жүргізу аяқталуда. Жоба бойынша 92 көпірден 90 көпірдің аралық құрылыстары орнатылды. Қазір 8 разъезд – Бескөл аралығындағы қалған екі көпірдің тіректерін орнату жұмыстары жүргізілуде.
Сондай-ақ, жоба аясында Сарықұм – Көкдомбақ, Көкдомбақ – Балқаш, Балқаш 1 – Балқаш 2, Балқаш 2 - Ортадересін, Ортадересін - Тоқырау, Тоқырау-Ақжайдақ, Ақжайдақ-Ащыөзек және т. б. аралықтарында 28 автожол өткелдерінің құрылысы жүріп жатыр.
Естеріңізге сала кетейік, Достық станциясынан Мойынты станциясына дейінгі екінші жолдардың жалпы ұзындығы – 836 шақырым. ҚТЖ олар бойынша қозғалысты ағымдағы жылдың маусым айында іске қосуды жоспарлап отыр, бұл бекітілген кестеден бұрын.
