Атырау облысында тоғыз вокзал жөнделеді

Еліміздің Көлік министрлігінің ұйғарымы бойынша биыл елімізде жалпы саны 125 теміржол вокзалына қайта жаңғырту жұмыстары жүргізіледі. Ол тізімге Атырау облысы бойынша тоғыз вокзал кіріп отыр.    

Атап айтқанда, жаңғырту жұмыстары Атырау, Ганюшкино, Аққыстау, Доссор, Мақат, Сағыз, Жамансор, Мұқыр және Исатай вокзалдарында жүргізілмек. Тапсырыс беруші – «ҚТЖ» ҰК» АҚ, ал Бас мердігер – «Батысальянсстрой» ЖШС. Жөндеу жұмыстарының басталуы сәуір айы, аяқталуы желтоқсан айы деп белгіленген.  

Өткен аптада вокзалдарды қайта жаңғырту жұмыстарының басталуына орай ұйымдастырылған шараға облыс әкімшілігі мен  Атырау жүк тасымалы және магистральдық желі бөлімшелерінің басшылары қатысты.

– Қайта жаңғырту барысында ішкі жұмыстар, инженерлік жүйелерді ауыстыру, мүмкіндігі шектеулі тұлғалардың қолжетімділігін, еркін қозғалысын қамтамасыз ету, атап айтқанда көтеру құрылғыларын орнату, арнайы бөлме, демалу бөлмелерін ұйымдастыру, халыққа қызмет көрсетуге және жақсартуға бағытталған құралдармен жабдықтау, сыртқы жұмыстар, жылу жүйелері мен ауыз су жүйелерін қайта жаңғырту, жолаушылар платформаларын жөндеу, абаттандыру және жарықтандыру, сыртқы жұмыстар бойынша ғимараттың сыртын, қасбетін, шатырын, баспалдақтарды, жолаушылар платформасын жөндеу, айналаны абаттандыру және жарықтандыру жұмыстары жүргізілетін болады, – дейді Атырау магистральдық желі бөлімшесінің бастығы Аралбай Қосымбаев.  

Айта кетерлігі, жоба ҚР Көлік министрлігі, «ҚТЖ» ҰК» АҚ және облыстық әкімдікпен бірлесе жүзеге асырылады. Былтыр қала әкімдігі қаланың кіреберіс қақпасы саналатын вокзалдың алдыңғы аумағына брусчатка тас төсеп, кеңейтіп, жас шыршалар отырғызып, абаттандырған болатын.  

Вокзал шаруашылығы бөлімінің бастығы Айбек Қуанышевтың айтуынша, жөндеу жасалатын вокзалдардың ең үлкені – Атырау вокзалы. 1-класты Атырау теміржол вокзалы 1972 жылы пайдалануға берілген. Жалпы ауданы 3744,8 шаршы метр. Ғимарат тәулігіне 500 жолаушыға арналып салынған. Қазіргі уақытта тәуліктік жолаушы саны 1308 адам. Ғимарат 3 қызметтік және 1 техникалық қабаттан тұрады. Ғимаратпен қоса жалпы ұзындығы 473 метр болатын биік жолаушылар платформасы бар. Соңғы күрделі жөндеуден 2014-2015 жылдары өткен. Атырау вокзалы арқылы бүгінгі күнде 14 жолаушылар пойызы қатынайды. Перронның ескілігінен қазіргі уақытта вокзал 1-ші жолға жолаушы қабылдамайды, өйткені перронның кей жері мүжіліп, апатты жағдайда тұр. Сол себепті жолаушыларды 2-ші, 3-ші, тіпті 4-ші жолдарда қабылдау орын алып отыр. Жөндеу кезінде осы олқылықтар жөнге келтірілумен қатар Атырау вокзалын кеңейту де қолға алынады деп күтілуде. Сондай-ақ Доссор мен Сағыз вокзалдарын жаңадан қайта салу жоспары да бар. «Жөндеу жұмыстарының жасалуына қарамастан барлық вокзалдар қалыпты режимде жұмыстарын жүргізе береді, яғни жолаушыларға тәулік бойына қызмет етеді» дейді бөлім басшысы.