Теміржол үстінен көпір салынуда

Шығыстан батысқа қарай созылып жатқан шойын жол Тараз қаласын екіге бөліп тұр. Соңғы жылдары шаһарда автокөлік қозғалысының артуы Жібек жолы көшесі арқылы өтетін жол өтпесінде кептеліс туғызып келген. Енді теміржол үсті арқылы көпір салынып, бұл мәселе түбегейлі шешімін таппақ.

Көпірдің құрылыс жұмыстары көктемде басталған. «Қаздорстрой» ЖШС бастығының орынбасары Қуаныш Әлмұхамбетовтің айтуынша, жобада ұзындығы 166 метр жол өтпесін салу көзделген. Құрылыс теміржолдың арғы жағындағы қалалық №15 мектептің тұсынан басталып, ең биік нүктесі темір жолдың үстінен өтеді. Келесі нүктесі Абай даңғылындағы полиция бөлімінің жанына жеткенде аяқталады.  

– Жоба өткен жылдың ақпан айында мемлекеттік сараптаманың оң қорытындысын алды. Биыл біз жобаны тендерден жеңіп алып, жұмысқа кірістік. Құрылыс жұмыстарының мерзімі – 21 ай. Жалпы құны – 16,5 миллиард теңге. Тапсырыс берушімен жасасқан шарт бойынша объектідегі жұмыстарды 2026 жылдың соңына дейін аяқтауымыз керек. Құрылыс учаскесінің жалпы ұзындығы 946 метрді құрайды. Көпір салу үшін құрылыс аймағындағы 68 нысан: оның ішінде 43 тұрғын үй, 25 кәсіпкерлік субъектілерінің ғимараты бұзылады. Бас мердігер «Қазақдорстрой» ЖШС сапа стандарттарын сақтай отырып, құрылыста озық инженерлік технологияларды қолданады. Сондай-ақ бағдаршам орнату, абаттандыру, жарықтандыру жұмыстары жүргізіледі, – дейді Қуаныш Әлмұхамбетов.

Көпір Абай көшесінің бойынан салынатын болғандықтан, тұрғындар «теміржол бойындағы арка бұзылып кете ме?» деп алаңдап келген. Қала әкімі Бақытжан Орынбеков шаһардың бір символына айналған сәулет өнерін қалпында сақтап, сол жақ бетке қарай, 70 метр әрі орналасатынын айтты. Көпір құрылысы жұмыстары пойыздар қозғалысына кедергі келтіріп жатқан жоқ. Кестеге сай жүріп жатыр.