Вокзалдар жаңа кейіпке енеді
Атырау облысы бойынша меншікті тілші
Биыл елімізде жалпы саны 125 теміржол вокзалына қайта жаңғырту жұмыстары жүргізілуде.
Соған сәйкес жаңғырту жұмыстары Атырау облысының 9 вокзал ғимаратында, яғни Атырау, Ганюшкино, Аққыстау, Доссор, Мақат, Сағыз, Жамансор, Мұқыр және Исатай вокзалдарында жүргізілмек.
Тапсырыс беруші – «ҚТЖ» ҰК» АҚ. Атырау магистральдық желі бөлімшесі вокзал шаруашылығы бөлімінің бастығы Айбек Қуанышевтің айтуынша, қазіргі уақытта Аққыстау, Ганюшкино, Мақат, Доссор және Сағыз станцияларының вокзалдары түгелдей құлатылып, сүріліп тасталған. Енді жаңа вокзалдың жобалық-сметалық құжаттамасы, темірбетон конструкцияларының, архитектуралық жобаның шешімдерін жасақтау жүріп жатыр. Соның ішінде Исатай, Мұқыр, Жамансор станцияларының вокзалдарындағы ЭО постты модульді ғимаратқа көшіру жұмыстары да жүргізілуде. Ол әрине белгілі бір уақыт алатын жұмыс екені түсінікті.
Мердігер мекемелер вокзалдарға техникалық тексеру жүргізіп, құжаттарды вокзал шаруашылығын жаңғырту дирекциясына жолдаған. Ал Атырау вокзалы бойынша жұмыстарды мердігер «БатысАльянсстрой» ЖШС жасайтын болды.
«Rise Project Group» жобалау мекемесі қазіргі уақытта Атырау вокзалы астымен жүретін инженерлік жүйелерді, жылу, электр желілерін, СОБ кабельдерін, өнеркәсіптік және азаматтық құрылыс жүйелерін көшіру бойынша жобалау жұмыстарымен айналысуда.
«Қазіргі таңда бұзып тасталған вокзалдарда вагон-контейнерлерден жолаушыларға арналған күту залы, вокзал кезекшісі бөлмелері жасақталған. Жалпы, өңірдегі вокзалдарды қайта жаңғырту барысында ішкі жұмыстар, инженерлік жүйелерді ауыстыру, мүмкіндігі шектеулі тұлғалардың қолжетімділігін, еркін қозғалысын қамтамасыз ету, атап айтқанда көтеру құрылғыларын орнату, арнайы бөлме, демалу бөлмелерін ұйымдастыру, халыққа қызмет көрсетуге және жақсартуға бағытталған құралдармен жабдықтау, сыртқы жұмыстар бойынша жылу жүйелері мен ауыз су жүйелерін қайта жаңғырту, жолаушылар платформаларын жөндеу, ғимараттың сыртын, қасбетін, шатырын, баспалдақтарды, жолаушылар платформасын жөндеу, айналаны абаттандыру және жарықтандыру жұмыстары жүргізілетін болады, – дейді Айбек Қуанышев.