Арыс көпірі қайта түледі

Егер спутниктік картадан Арыс қаласының үстінен қарасаңыз, қаланың төрттен бір бөлігін теміржол учаскесі бөліп тұрғанын көруге болады. Мұнда негізгі бөлік – қала орталығы, ал екінші бөлігі Сырдария деп аталады. Жалпы, қала халқының саны шамамен 45 мыңға жуықтайды десек, оның 15 мыңға жуығы «арғы бет» деп аталып кеткен осы Сырдарияда тұрады.

1904 жылы іргетасы қаланған вокзал ғимаратының маңынан Кеңес заманында екі араны жалғайтын жаяу жүргіншілер көпірі бой көтерген. Арыс станциясының кәсіподақ ұйымының төрағасы Телғозы Шорахан бұл нысан 1980 жылдары елдің игілігіне берілгенін айтады.  

Бүгінде Шымкент магистральдық желі дирекциясының меншігіне жататын көпір өңір теміржолшыларының жіті бақылауында. Яғни сала мамандарының бір бөлігі ағымдық жөндеуден өткізіп, күтім жасауға жауапты болса, енді бір бөлігі темір жолдың қауіпсіз қозғалысын қамтамасыз ету мақсатында түрлі шаралар ұйымдастырып, ескерту тақтайшалар іліп, үнпарақтар таратып жатады.  

Жуырда арыстық теміржолшылар жергілікті атқарушы билік өкілдерімен мәміле жасай отырып, тағы бір игілікті істің ұйытқысы болды. Арыс жол дистанциясының жауапты мамандары соңғы бес жылдықта талапқа сай болмай тұрған нысанды ағымдық жөндеуден өткізіп, жаяу жүргіншілер көпірін бояп-сырлап шықты. Ал бас-аяғы 350 метрге жуықтайтын аспалы көпірдің Сырдария жақ бетіндегі Д.Нұрпейісова мен Ғ.Мүсірепов көшелеріне дейінгі аяқ жолды жергілікті әкімдік жөндеп шығыпты. Өйткені жолдың жоқтығынан жүргіншілер қыста – мұз бен батпақтан, жазда шаң-тозаң мен топырақтан әбігерге түсетін. Осы мәселенің шешілуін сұраған жергілікті тұрғындар қала әкіміне арнайы өтініш жолдаған соң жағдайдың өзектілігін ескерген қала әкімі Қ.Маңқараев аймақ теміржолшыларымен бірлесе еңбек етіп, жергілікті тұрғындарға барынша қолайлы жағдай жасауға ұйытқы болған.  

– Енді міне қолда бар күшіміз бен материалдарымызды үнемдеп пайдалану арқылы нысанды қайта жөндеуден өткіздік. Ашық аспан астында күн мен жауыннан мүжіліп, бүлінген баспалдақтарды бүтіндедік, – дейді Арыс жол дистанциясының бас инженері Думан Әсілханұлы.  

Ал Арыс электрмен жабдықтау дистанциясының мамандары түн мезгілінде аяқ жолды жарықтандыру мақсатында электр желілерін жаңартып, бағаналарын бекітіп берген. Қала әкімдігіне қарасты мекеме қызметкерлері болса қысқа мерзім ішінде көпір маңындағы жолдарды тақтайдай қып асфальттап, жиегіне бордюр қойып, жаяу жүргіншілердің жағдайын жасапты. Күніне 200-ден астам адам өтетін нысанның қайта игілікке жарағанына жергілікті тұрғындар қуанып, істің басы-қасында жүрген азаматтарға алғысын жаудыруда.