Манкент вокзалы жаңа келбетке енеді

Манкенттегі теміржол вокзалында жүргізіліп жатқан күрделі жөндеу жұмыстары қарқынды түрде жалғасуда. Құрылысқа байланысты іргелес орналасқан Манкент станциясының бір бөлігі билет кассирлеріне уақытша қызмет көрсетуге беріліп, жолаушыларға барынша қолайлы жағдай жасалған.

Бірінші қабатта орналасқан 40 шаршы метрлік кеңседе билет сату мен анықтама қызметі және күту залы да қалыпты жағдайда жұмыс істеп тұр. Жұмыс уақыты таңғы 9:00 мен кешкі 18:00 аралығы болғанымен, мұнда келушілер үшін ішкі және сыртқы сатылым терезелері де ұйымдастырылған. Сонымен бірге мүмкіндігі шектеулі жандарға арналған арнайы арба жолы да орнатылған.  

– Станция ауласында касса орналасқан бағытты көрсететін көрнекі белгілер қойылып, жолаушылардың қозғалысын жеңілдетуге баса назар аударылды. Бұл енді уақытша болса да азаматтар үшін қолайсыз жағдайлар туындатпау үшін іске асырылды, – дейді станция бастығы Қуаныш Табеев.  

Әрине бұл күндері дәстүрлі билет сату кассасымен қатар, интернет заманы дамып, қолжетімділік мүмкіндігі кеңейген кезең болып тұрғаны сөзсіз. Сондықтан көпшілік билетті интернет арқылы сатып алғанды жөн көрсе, кассадан билет алатындар да жоқ емес. Шымкент магистральдық желі бөлімшесінің вокзал шаруашылығы мамандары осы жайтты ескере келе Манкент елді мекенінде күндізгі уақытта кассаны ашық ұстауға ұйғарым жасапты. Себебі Манкент үлкен станция санатына жатпағанымен, мұнда тәулігіне 22 жолаушылар пойызы аялдайды. Олардың тоқтау уақыты 2-3 минутты ғана құрағанымен, жергілікті тұрғындар мен емдеу-сауықтыру кешеніне келушілер пойызға мініп-түсіп үлгереді.  

Қазіргі таңда вокзал ғимаратының іргетасын нығайту жұмыстары жүргізілуде. Жалпы ұзындығы 230 метр болатын фундамент құйылып, 140 текше метр бетон пайдаланылған. Сонымен қатар ғимарат жанынан 60 шаршы метрлік қосымша құрылыс салынуда. Онда күзет қызметі мен құқық қорғау органдары өкілдеріне арналған кабинеттер орналаспақ.  

– Қазір шатырды толық жаңалап жатырмыз. Терезелердің биіктігі 3,5 метрге дейін көтеріліп, готикалық үлгіде қайта жасалуда. Барлық жұмыс жоспарға сай жүрсе, ай соңына дейін шатыр жабылып, ішкі әрлеу жұмыстарына кірісеміз. Ал жыл соңына дейін ғимаратты толық пайдалануға беруді жоспарлап отырмыз, – дейді мердігер компания «Kanfar Building» ЖШС жүргізіп жатқан құрылыс алаңындағы учаске бастығы Имантай Дулат.  

Салаға жауапты мамандардың айтуынша, Түлкібас вокзалында да тап осындай қызу құрылыс. Екі нысанның да жоспарға сай жөнделіп шығуына жауапты компания өкілдері қолға алған істің ойдағыдай іске асатынына уәде беріп отыр.