Атырауда биыл 30 шақырымға жуық жол күрделі жөндеуден өтеді
Атырау облысы бойынша меншікті тілші
Атырау магистральдық желі бөлімшесі бойынша өткен жылы пойыздар қозғалысы қауіпсіздігін бұзу жағдайлары, апаттар, оқыс оқиғалар тікелмеген. Ал алдыңғы жылы 2 жағдай, 4 оқиға орын алған.
Сондай-ақ жол сапасына қатысты 3-дәрежелі ауытқулар 337-ге, 4-ші дәрежелі ауытқулар 24-ке, қанағаттанғысыз шақырымдар 49 шақырымға қысқарған, яғни 2024 жылы 56 шақырым тіркелсе, былтыр күрт азайып, небәрі 7 шақырымды құраған. Сонымен қатар техникалық құрал-жабдықтардың істен шығуы 54 жағдайға қысқарған.
Бөлімше бастығының бірінші орынбасары Аманқос Жылқыбаевтың айтуынша, былтыр 66,721 шақырым жолды күрделі жөндеу жұмыстары жоспарланып, ол жүз пайызға орындалған. Олар 4-разъезд – 5-разъезд – Ганюшкино, 265-разъезд – 279-разъезд және 465-разъезд –Толтыр – 467-разъезд телімдерінде жүргізілген. Сол секілді 3,245 шақырым күшейтілген орташа жөндеу жоспары 9,871 шақырымға орындалған.
Биыл бөлімше бойынша 29,7 шақырым жолды күрделі жөндеу жоспарланып отыр. Олар Махамбет – Атырау, Мақат – Афанасьево – Рзд9, Рзд 467 – Рзд 468 – ст. Құлсары учаскелерінде жүргізілмекші. Сондай-ақ 9,2 км жол орташа күшейтілген жөндеуден өтеді. Бұрмаларды ауыстыру – 20 дана, қолданылған бұрмаларды пайдалану – 8 жиынтық, мал басудан қоршау салу 74,6 шақырым, оларды жөндеу 25 шақырым жоспарланған.