Жаңаланған жолдар – қауіпсіздік кепілі
«Қазақстан теміржолшысы» газетінің тілшісі
Биыл еліміз бойынша үш мың шақырымға жуық магистральдық инфрақұрылымды жаңғырту жоспарланып отыр. 14 мамырдағы жағдай бойынша аталған көлемнің үштен бірі орындалып, желінің жаңартылған учаскелерінің жалпы ұзындығы 1003 шақырымға жеткен.
Қытаймен шекарадағы халықаралық көлік дәлізінің негізгі буыны болып табылатын Алтынкөл – Жетіген және Сексеуіл – Қызылжар стратегиялық маңызды бағыттарындағы жекелеген теміржол учаскелерін жаңғырту аяқталған. Сонымен қатар 129 шақырымдық Ақсу – Жаңа-Семей теміржол учаскесін жаңғыртудың бірінші кезеңі іске асырылды. Жұмыс жоспарланған кестелерге сәйкес орындалуда. Жобаларды іске асыру теміржол желісінің өткізу қабілетін және тасымалдардың сенімділігі мен қауіпсіздігін арттыруға, сондай-ақ Қазақстанның халықаралық көлік маршруттарындағы транзиттік әлеуетін нығайтуға мүмкіндік береді.
Жалпы темір жолдардың жай-күйін жақсарту және үздіксіз, қауіпсіз тасымалдауды қамтамасыз ету үшін 2023 жылдан бастап 2029 жылға дейін 11 мың км темір жолды жөндеу бағдарламасы жүзеге асырылуда. Соңғы үш жылда аталған бағдарлама шеңберінде 4450 шақырым жол жөнделіп, соның ішінде 1640 шақырымнан астамы күрделі жөндеуден өткен болатын. Ал биыл 1557 шақырым жолды күрделі жөндеуден өткізу жоспарланған.
Мамандар сөзіне сүйенсек, өткен жылдың қорытындысы бойынша Бейнеу – Маңғыстау және Павлодар – Семей телімдерінде күрделі жөндеу жүргізу қажеттілігі мәселесіне толық нүкте қойылыпты. Ал биыл Семей – Аягөз және Мақат – Бейнеу телімінде жөндеу жұмыстары аяқталмақ. Сонымен қатар Астана – Алматы, Астана – Тобыл, Көкшетау – Қостанай, Арыс – Шеңгелді және басқа телімдерде жөндеу түрлері жалғасатын болады.
Жалпы орындалған жұмыстар ұзындығы 1283 км учаскелерде жолаушылар пойыздарының қозғалыс жылдамдығын арттыруға, ағаш шпалдардағы жолдың ұзақтығын 71%-ға қысқартуға, ал жөндеуді қажет ететін учаскелерді 215 шақырымға азайтуға қысқартуға мүмкіндік берді.
Соңғы үш жылдағы жолдың тұрақты жақсаруы мобильді-диагностикалық кешендердің бағалауы арқылы да расталып отыр. Мәселен, 2023 жылмен салыстырғанда 3-ші және 4-ші дәрежелі ауытқулар төмендеп, қанағаттанарлықсыз бағалауға ие шақырымдар 1 303 км-ге қысқарған.