ҚТЖ-да инфрақұрылымды дамыту бағдарламасы аясында ауқымды жұмыс атқарылуда
«Қазақстан теміржолшысы» газетінің тілшісі
Қазіргі уақытта «ҚТЖ» ҰК» АҚ Қазақстан Республикасының стратегиялық құжаттары негізінде әзірленген 2023-2029 жылдарға арналған магистральдық теміржол желісі объектілерін дамыту бағдарламасын басшылыққа ала отырып, көрсетілетін қызметтердің сапасын арттыруды мақсат етіп отыр.
Бағдарлама ірі инфрақұрылымдық жобаларды іске асыру және «тар жерлерді» жою арқылы теміржол желісінің өткізу қабілетін арттыруды көздейді. Осы ретте пойыздар қозғалысының қауіпсіздігін қамтамасыз ету, сондай-ақ компания қызметкерлерінің еңбек қауіпсіздігі мен денсаулығын қорғау әдеттегідей, басымдыққа ие болып қалуда.
Сонымен, темір жолдың өткізу қабілетін арттыру мақсатында біраз шаруаның басы қайырылғанын атап өткен жөн. Мәселен, Шу станциясында 4 жолдың салынуы нәтижесінде өткізу қабілеті тәулігіне 11 жұп пойыздан 20 жұп пойызға дейін ұлғайтылса, Сарышаған станциясында да 4 жол салынып, нәтижесінде станция жолдарының өткізу қабілеті тәулігіне 25 жұп пойыздан 29 жұп пойызға дейін артты.
2023-2029 жылдарға арналған бағдарлама шеңберінде 11 мың км теміржол жолын жөндеу көзделген. Соның ішінде 2023 жылдан 2026 жылдың 6 айына дейін жоспарланған 4 817 км орнына нақты 5 134 км жөнделіп, жоспар 106%-ға орындалып отыр. 2026 жылдың І жартыжылдығында жоспарланған 603 км орнына 686 км орындалып, көрсеткіш 114%-ды құрады. Қазір Желаево – Пойма учаскесіндегі ұзындығы 728 метр көпірге күрделі жөндеу жүргізілуде.
Жасанды құрылыстардың 30 объектісінде жөндеу жұмыстары Астана және Ақтөбе өңірлерінде мамандандырылған көпір жасақтарының құрылуы, сондай-ақ Қапшағайдағы қолданыстағы жасақтың қызметі арқасында орындалды.
Сала мамандарының айтуынша, жасанды құрылыстарды ағымдық күтіп ұстау шеңберінде бүгінгі күні 765 ақау жойылған. Шалқар – Сексеуіл учаскесіндегі 12 станцияда диспетчерлік орталықтандыру жүйесі жаңғыртылған. Үш станцияда парктік дауысзорайтқыш хабарлау байланысы салынған. Бұдан бөлек 29 станцияда электрлік орталықтандыру жүйелері мен жабдықтары кешенді түрде жаңғыртылып, 20 қоректендіру панелі және 9 дизель-генераторлық агрегат ауыстырылды. Ал сұрыптау жүйелерін дамыту бағдарламасы шеңберінде Қарағанды-Сұрыптау станциясының жұп дөңесін жаңғыртуға арналған жобалау-сметалық құжаттаманы әзірлеу бойынша шарт жасалып, жұмыстар жүргізілуде.