Вагон жетіспеушілігі жоқ
«ҚТЖ-Жүк тасымалы» АҚ бас директорының операциялық жұмыс жөніндегі орынбасары Мұқтар Жамбыловтың мәлімдеуінше, ағымдағы жылдың 11 айында 233 млн тонна жүк тиелсе, бұл өткен жылдың көрсеткішінен 6% артық.
Соның ішінде Қазақстан бойынша 156 млн тонна тасымалданса, экспорт – 77,5 млн тонна. Ал астық 7,8 млн тонна тиелсе, бұл өткен жылдың сәйкес кезеңімен салыстырғанда 57% көп. Қазақстандық астық пен ұнның негізгі тұтынушылары – дәстүрлі Өзбекстан, Тәжікстан, Ауғанстан және Иран. Жыл соңына дейін 11 млн тоннадан астам астық тиелсе, бұл өткен жыл деңгейінен 30% артық. Сонымен бірге экспортқа 8,7 млн тонна жөнелтілсе, өсім 47% құрап отыр.
«Нұр Отан» партиясының «Қазақстан 2021: Бірлік. Тұрақтылық. Жасампаздық» Сайлауалды бағдарламасының «Индустриялық даму» бағыты бойынша партия отырысында теміржол көлігімен биылғы астық тасымалы жайлы осындай мәліметтерді алға тартқан Мұқтар Жамбылов вагон жетіспеушілігі жоқ екендігін жеткізді. Республикада әр түрлі жеке иелікте 135 мың вагон тіркеуде болса, оның 39% пайызы «Қазтеміртранс» АҚ иелігіндегі вагондар.
– Ағымдағы жылдың 11 айында «Қазтеміртранс» АҚ вагондарына тиелген астық көлемі 23,7 млн тонна болса, бұл барлық экспорттың 30% шамасын құрайды және өткен жылдың сәйкес кезеңімен салыстырғанда 1 млн тоннаға асқан. Шамамен астықтың 51% «Астық Транс» АҚ және «Теміртранс» АҚ вагон паркіне тиелген, - деген ҚТЖ өкілінің айтуынша, биылғы астық пен ұнтақ өнімдерін тасымалдау үшін жылжымалы құрамның жетіспеушілігі астық тасушылардың және вагондар айналымы уақытының аздығымен тікелей байланысты.
«ҚТЖ-Жүк тасымалы» АҚ мәселені шешуді Ауыл шаруашылығы министрлігі атынан Азық-түлік корпорациясының астық сатып алу бойынша интервенция жүргізу қажеттігінен көреді. Бұл жыл бойы өнімдерді біркелкі тасымалдауға мүмкіндік беріп, маусымдық дүрбелеңді болдырмайды.
Көршілес теміржол әкімшіліктерінің инфрақұрылымдық шектеулері, сондай-ақ қазақстандық порттардың астық терминалдарының өткізу қуаты орташа вагон ағымын айтарлықтай арттырады. Мысалға, экспорттық қатынасқа жөнелтілген астықтасушы-вагондардың орташа айналымы 33 тәулікті құраса, есептік айналымда 15 тәулік, жүк операцияларында орташа тұрып қалу уақыты 6,2 тәулікті құраған.
А. ИСАҚОВ, Астана