Атыраулық теміржолшы адам өз өміріне алдымен өзі жауапты екенін айтады
Өндіріс қауіп-қатерсіз болмайды, қозғалыс бар жерде еңбек бар, еңбек бар жерде қауіп те, қатер де бар. 2018 жылдың 12 айында Атырау теміржолы бөлімшесі бойынша қозғалыс қауіпсіздігін бұзудың 5 оқиғасы тіркелген. Үлкен апат орын алмағанымен, вагонның доңғалағы рельстен шығып кету, автокөлікпен соғысу, сонымен қатар сырт адамдардың өздерінің кесірінен адам басып кету фактілері болған.
Адамдардың өз өмірлерін қатерге тігіп, түрлі «эксперимент» жасайтыны, өкінішке орай, барлық уақытта сәтті аяқтала бермейді. Мысалы, өткен жылы бір адам өтіп бара жатқан вагонға жармасса, екіншісі вагон астынан өткен, ал тағы біреуі жол бойына шығып кеткен. Нәтижесінде екеуі аяғынан зақым алса, біреуі ауруханада жан тапсырды. Өкінішті ма? Әрине, өкінішті. Бірақ сол адамнан басқа кім кінәлі? Адамдар ең алдымен өз қауіпсіздігін жете ойлауы тиіс. Басқа ешкімнің ештеңесі кетпесі анық. Сақтық – ең алдымен өзің үшін екенін әр адам көкейде ұстауы тиіс.
Бұлардың бәрі – станция немесе кірме жолда орын алған жағдайлар. Жалпы, қауіпсіздік инженері Ф.Қазжанованың айтуынша, бөлімшеге қарасты 1,2,3 класты станцияларда әр үш сағат сайын дыбыс күшейткіш байланыс құралы арқылы адамдарға темір жолдан өту тәртібі туралы хабарланып отырады. Вокзал басында қауіптің алдын алу мақсатында «Темір жол – қауіпті аймақ», «Темір жолдағы қауіптілік», т.б. тақырыптарда 7 бейнеролик әр 40 минут сайын көрсетіліп отырады. Станция басшылары желілік полиция мен әскерилендіріліген күзет қызметімен бірге жиі рейд жүргізеді. Бірақ, соған қарамастан әлгіндей өкінішті оқиғалар жылда қайталанады.
Ал вагон доңғалақтарының рельстен шығып кетуіне дөңестен вагон ағытқандағы олқылық және вагондардың артық салмақ тиеуі де әсер етіп жатады. Сондықтан жүк жөнелтушілермен бұл бағытта үнемі жұмыс жүргізіп отыру маңызды. Өйткені шамадан тыс жүк қауіпсіздікке нұқсан келтіреді.
Аталған мерзімде локомотив машинистерімен 587 шұғыл тежеу қолданылған, бұл да қауіпсіздікке зиян. Ол көбіне жол бойына малдың шығып кетуінен болады. 12 айда сондай 10 жағдай орын алған. Оның 9-да мал басып кетсе, 1-де автокөлік соғысқан. Жолаушылар пойызында да стоп-кран 4 рет тоқтатылған. Бұл вагон ішіндегі қаннен-қаперсіз келе жатқан жолаушыларға да қауіпті екені түсінікті. Бөтен адамдардың рұқсат етілмеген жерде жүруі жиілеп, сондай 240 азамат тіркеліп, әкімшілік хаттама толтырылса, 7 адамға 32 467 теңге айыппұл салынған. Жергілікті тұрғындар арасында темір жолдың қауіптілігі туралы түсіндіру жұмыстары ұдайы жүргізіліп отырады. Сонымен қатар бөлімше бойынша 418 ескерту аншлагтары мен белгілер жаңартылған, атап айтқанда: «Пойыз құрастырушы, есіңде ұста, сені үйіңде күтіп отыр!», «Пойыздан сақтан», «Адамдар, өз өмірлеріңізді сақтаңдар!», т.т.
– Станцияларда жаяу жүргінші жолдарының болуы да тексеріліп отырады. Кейбір станцияларда малдан қоршаулар жоқ, тек Жантерек станциясында жұмысшылар күшімен орнатылған. Станциялардағы радиостанциялардың жеткіліктілігі де бақылауда ұсталады. Бүгінде, мысалы, қажетті 350-дің орнына 228-і ғана бар, оның да 150-і ғана жұмыс істеп тұр екен, – дейді қауіпсіздік инженері.
Бөлімше бойынша 12 айда қозғалыс қауіпсіздігі тақырыбына барлығы 1340 техникалық сабақ өткізіліп, оған 28483 адам қатысқан, негізінен вагон қараушылар, пойыз құрастырушылар, машинистер, белгі берушілер, вагон жөндеушілер, т.б. Сондай-ақ, бөлімшедегі қозғалыс ревизоры тарапынан қозғалыс қауіпсіздігі, пойыз және маневрлік жұмыстар кезінде пойыз және техникалық құжаттамаларды рәсімдеу, сұрыптау дөңесінің технологиясы, локомотив бриагадалары мен станция қызметкерлерінің сөйлесу регламенті, станция техпроцесі мен лауазымдық нұсқаулықтар талабын орындау мәселелері қаралып, практикалық көмек көрсетілген.
Қосұйым Мұқашев, Атырау
Суретті түсірген автор