Маман кеңесі маңызды
Локомотив пайдалану деполарының психологиялық жүктемеден арылу бөлмелерінде депо қызметкерлері үшін кәсіби кеңестер беріледі. Өткен жылы психолог мамандарының көмегіне 4 мыңнан астам машинист пен олардың көмекшілері жүгінген.
Психолог кабинетінде локомотив бригадаларының мүшелеріне күйзелісті жағдайлардан кейін миға түскен салмақтан босаңсуға, арылуға көмектеседі. Машинист мамандығы мәртебелі мамандық болумен қатар жүйкеге салмақ түсіретін жауапкершілігі де жоғары мамандық. Олай дейтініміз, ұзын құрамды тіркеп алып келе жататын локомотив құлағындағы машинистер жол үстінде күтпеген жерден кездейсоқ жағдайларға тап болып жатады. Мысалы, адамдардың, қараусыз малдардың жолға шығып кетуі, жолға бөгде заттың қойылуы, тағысын тағылар. Айталық, былтыр темір жолдарда мал-жанды басып кетудің алдын алу үшін машинистер жүк және жолаушылар пойыздарын 3200-ден астам рет шұғыл тежегіш басып, тоқтатуға мәжбүр болған. Локомотив бригадалары мүшелерінің кәсіби әрекет етуінің арқасында 90% оқиғада адамды басып кетуге жол берілмей, өмірлерін сақтап қалған. Өкінішке қарай, барлық оқиға сәтті аяқталмайды.
Алайда, бұл жерде ескеретін жайт, мұндай оқиғалар машинистер мен олардың көмекшілерінің жүйкелеріне салмақ түсіреді, ал бұл өз кезегінде, олардың психикалық саулығына кері әсерін тигізері сөзсіз. Ал жүйкеге түскен салмақтан арылту бойынша оңалту курсы локомотив бригадаларының жұмысқа қабілеттілігін сақтап қалуға септігін тигізуде.
Атап өтерлігі, локомотив бригадасын жасақтау барысында психологтың қорытындысы міндетті түрде ескеріледі. Неліктен дейсіз ғой, білікті маман тестілеу өткізу арқылы адамның жеке қасиеттеріне, тіл табыса білу сияқты қасиеттеріне баға береді. Ал маманның бұл кеңестері жұмыс барысында ұрыс-керіс, жанжалдың туындауынан сақтап, стандартты емес жағдайларда машинистер мен олардың көмекшілерінің бірлесе әрекет етіп, ұйымшылдықпен жұмыс істеуіне ықпал етпек.
Ислам ТАЛҒАТ