Жылу берілді

Алдағы қыс маусымына тиянақты дайындық жасап, нысандардың жұмысқа әзірлігіне көз жеткізген «Теміржолсу-Қызылорда» мекемесі тұтынушыларына түгел қазан айының 15-нен бастап жылу берді.

Оған дейін 8 жылу қазандығында, 29 сумен қамту пунктінде, 16 су қыспақты мұнарада және 3 су құбырлық сорғы станциясында ағымдық жөндеу, тексеру, дайындау жұмыстарын ұйымдастырған ұжым алдағы қатал маусымға тас-түйін дайындықтан өткен екен. Шиелі, Жаңақорған және Белкөл станцияларындағы жылу қазандықтары көгілдір отынмен жылыталады. Ұжымның қыс маусымына дайындығы жайлы мәлімдеген мекеменің бастығы Марат Шайжан алдағы уақытта да барлық жұмыстардың бақылауында болатынын білдірді.

– Алдағы қыс маусымына дайындық барысында барлық нысандар ағымдық жөндеуден өткізілді. Жылуды тұтынушыға дейін жеткізетін 1,621 км жылу құбырын, 30 ілмекті арматураны жуыпшайып, қысыммен тексеруден өткіздік. Қатты отынмен жылытылатын жылу қазандықтарына керекті 980 тонна көмірге тапсырыс келісімшарты жасалған. Тапсырыстың алғашқы легі, яғни 211 тонна көмір қазандықтардың отын қоймаларына түсірілді. Қалған тапсырыстар алдағы күндері орындалады, – деп ақпар берді Марат Шайжан.

Жылу маусымы басталған сәттен бастап мекеме мамандары тарапынан жылу жүйелері күнделікті бақыланып, апатты ақаулы жағдай орын алса, дереу қалпына келтіруге дайын. Жылу пештері мен қазандықтардың шығу нүктесінен 55-60 градус шамасында берілетін жылу температурасы қолданушыға дейінгі аралықта айтарлық өзгермейтіндей етіліп жылу сақтау орамаларымен қапталған. Жылу көздерінен сағатына 0,363/гкал көлемінде таратылатын жылу қуаты тұтынушыларға толық жеткізіліп, жұмыс бөлмесін қажетті температурада тұрақты жылытатын болады.

Сонымен қатар мекемеде техникалық және өрт қауіпсіздігі шаралары қатаң бақылауға алынған. Ұжым теміржолшыларына қажетті қыстық киімкешектер, суықтан қорғану заттары берілген. Атқарған жұмыс санатына орай теміржолшыларға сүт өнімдері берілуде екен. Ұжымдағы еңбек қорғау шараларына белгіленген қаржы толық игерілуде.