Контейнерлік вагондар құрамасының сыйымдылығы үшін жолдар ұзартылып жатыр
Қызылорда облысы бойынша меншікті тілші
Қызылорда магистральдық желі бөлімшесінің басшылығымен аймақта аса ауқымды жол табанын жаңғырту жұмысы басталды. Станциялық жолды 800 метрден 1650 метрге дейін ұзарту жұмысы бұл өңірде бұрын-соңды болмаған, бірінші рет қолға алынып отыр. Қызылорда темір жолының Керкелмес станциясындағы 1-ші жолды ұзарту үшін кеше алғашқы 4 сағаттық толаскез алынды. Сағат 12.00-де басталған жұмысқа Қызылорда жол дистанциясының бүкіл техникасы мен 3 учаске жолшыларынан бөлек, қалпына келтіру пойызы техникасы мен байланыс және белгі беру дистанциясының жұмысшылары тартылды. Барлығы 30 шақты адам күні бұрын белгіленіп, келісілген жұмыс көлемін өлшеулі уақытта бітіруге тырысып, іске қызу кірісті. Бүгін жер төсемін дайындап, жолдың үстіңгі қабатын салып үлгерулері керек, ертең тағы да он сағаттық толаскез алынып, байланыс құралдары мен стрелка бұрмаларын орнықтырып, жолды іске қосу жұмыстары жүргізіледі. Қызылорда магистральдық желі бөлімшесі бастығының орынбасары Ербол Оңғарбаевтың басқаруымен жол дистанциясының орынбасары Абдулла Досымов пен Қызылорда ЖТ қауіпсіздік бөлімінің бастығы Бекжан Өтеулиев негізгі жұмыс көлемін атқарып жатқан Қызылорда қалпына келтіру пойызының ЕдК-300/2 кранының жұмысын қадағалауда, рельс кесетін, тесетін, дәнекерлейтін, көтеретін, шпал таситын әмбебап техника МпТ кранының жұмысын да бақылауда. Жолшыларда шағын механизация құралдары жеткілікті.
– Бүгінгі таңда Қазақстан темір жолында ұзынқұрамды контейнерлік құрамдар қозғалысы жанданғаны белгілі. Біз бүгін сол ұзын құрамды пойыздар сыймай қалмас үшін 800 метрлік станция жолын 1650 метрге дейін ұзартып жатырмыз, бұл Қызылордада бірінші рет салынуда. Станцияның жолына пойыздар қарама-қарсы келіп қиылыспас үшін бұл бүгінгі таңда аса қажет жоба, – дейді Қызылорда магистральдық желі бастығының орынбасары Ербол Оңғарбаев.
Тамыздың соңғы күндері болса да Қызылорданың аптап ыстығын елең қылмастан ортақ іске жұдырықтай жұмылған теміржолшылар тынымсыз төрт сағат бойы жұмыс істеді, техниканың дүрілдеген дыбысы ен даланы жаңғыртып, 800 метрлік ескі жолға жалғасатын тағы 800 метрден асатын жол төсемін дайындап, байланысшылар # 5 стрелканы жылжытып, ертеңгі негізгі жұмысқа сақадай сай етіп бітірді. Ертең жұмыс тағы да жалғасады...