Қазалы теміржолшылары күрделі жұмыс-желі айқастырмасын сәтті ауыстырды

Шілденің ми қайнатар аптап ыстығы басылып, күздің жанға жайлы жайма-шуақ күні. Болат жолдың бабын жасап, технологиялық талапқа сай келтіріп, пойыздардың қозғалыс қауіпсіздігін сақтауды кәсіби міндеті санайтын жолшылар қауымы үшін жұмыс қызған. Қазалы жол дистанциясы жолшыларының бір тобы бүгін Қазалы станциясының солтүстік алқымындағы алтыншы жолдың №202 бағыттамалық бұрмасының крестовинасын ауыстыру жұмыстарына кіріскен. Ақаутапқыш арбамен жолды тексерген кезде анықталған крестовинаны ауыстыру жұмысына жол бригадирі Руслан Ибраймов басшылық жасауда.

– Бекеттегі маневрлік және пойыздық жұмыстар әсерінен бұрма крестовинасының аргонмен дәнекерленген жерлері ұрылып, майысып, қалыпты нормадан ауытқуына байланысты жаңасына алмастырамыз. Крестовинаның кемшін тұсын арнайы құрылғылардың көмегімен босатып алып, орнына жаңасын техталапқа сай орналастырып, бекіту, одан кейін диспетчерлерге және жауапты тұлғаларға қосымша хабарлап, тексеруден өткізілгеннен кейін және бір бақылаудан өткізіліп барып қолданысқа беріледі, – дейді бригадир.

Бірнеше сағат бел шешпей қимылдаған бригаданың крестовинаны алмастырудың барлық технологияларын сақтауды қадағалаған бригадир жолдың, бағыттамалық бұрманың технологиялық талапқа сай болуын қосымша тексеруден өткізіп, барлығы талап дейгейінде атқарылуын бақылауда ұстады. Бұл ағымдық күтім барысында атқарылған жұмыс болса да күрделі процесс болғандықтан оған бригаданың тәжірибелі жолшылары, 3-4 разрядты жол жөндеушілер Қуаныш Зейналиев, Жеңісбай Жәлиев, Тілекбай Қапашов, Алмас Жаңабаев пен Айбек Тәшенов қатыстырылып отыр екен.

– Кешенді жол машиналары, ақаутапқыш арбалардың және күнделікті шаблонмен жол өлшемін алу кезінде анықталған кемшіліктер деңгейіне қарай дер кезінде жойылып отыруы тис. Бүгін, міне, №202 бағыттамалық бұрмадан анықталған кемшілікті жойып, ақаулы крестовинаны жаңасымен ауыстырып шықтық, жігіттерге рахмет, жұмыс талапқа сай, сапалы орындалды, – деп мәлімдеді жол бригадирі Руслан Ибраймов.