Кәсіпкерлікті дамыту үшін темір жол тұйықтарын салу - басты міндет
Абай облысы бойынша меншікті тілші
Еліміздің шығысында соңғы үш жылда 198 шақырымды құрайтын теміржол және автомобиль жолдары жаңадан салыныпты. Олардың барлығы кәсіпкерлікті қолдаудың мемлекеттік бағдарламасы аясында инженерлік-инфрақұрылымдық нысандардың құрылысын жүргізу бойынша қолға алынған. Теміржол тұйықтары мен кірме жолдар салуда Семей ЖТ бөлімшесі республикада көш бастап тұр. Автокөлік және теміржол қатынасы үшін 2018 жылдан бастап қазіргі уақытқа дейін жалпы сомасы 3,7 миллиард теңгеге 31 жоба іске асырылыпты. Бұл жо- балар жолдар мен теміржол тұйықтарын түрлі кәсіпорындарға жеткізу бойынша жұмыстарды құрайды. Оны негізінен орта бизнесті қолдау мақсатында облыс әкімдігі қаржыландырған. Соның нәтижесінде Жаңа-Семей, Аягөз, Жаңғызтөбе, Шар станциялары бойынша жаңадан тұйық желілер салынған және әрі қарай да жалғаспақ. Себебі, қазіргі таңда түрлі кәсіпорындардан, оның ішінде агроөнеркәсіптік сектордан 9 өтінім өңделуде. Яғни, астық элеваторлары мен өсімдік майын өңдейтін зауыттарға, құрылыс заттарын өндіретін кәсіпорындарға жаңадан теміржол тұйықтарын салу қажет. Осы орайда инфрақұрылымды дамыту үшін арнайы жобаларды іске асыру бойынша бірқатар жоспарлар бар. Жобалау-сметалық құжаттамалары әзірленген, сараптамалардың қорытындылары дайын нысандарға облыс әкімдігі қаражат салуға дайын. Бұл ретте белсенді құрылыс жүргізіп жатқан кәсіпкерлердің де саны артып келеді. Мәселен, Семейдегі былғары кәсіпорны мен Глубокое қаласындағы май экстракциялық зауытын алуға болады. Дегенмен теміржол салу бойынша Жаңғызтөбе станциясының қызметін пайдаланатын түсті металл кенін өндіруші кәсіпорындар алдыңғы орында тұр. Олардың тарапынан екі өтінім орындалған. Жалпы Жарма өңірі бойынша, өткен ғасырдың 90-шы жылдарындағы тоқырау тұсында жабылып қалған байырғы кен орындары қайта ашылып жатыр. Соның нәтижесінде әлеуетті клиенттер тарапынан тұйық желілер салуға байланысты ұсыныстар көптеп түсуде. Бұл тарапта тағы үш өтініш келіп түсіпті. Сондай-ақ, пайдаланусыз қалған кірме жолдар мен қосалқы жолдар толықтай орташа жөндеуден өтіп, қайтадан пайдалануға берілген. Сонымен қатар, Аягөз станциясы бойынша да тұйық желі салу ісі қарқынды. Ал, бұл шаралардың барлығы Семей ЖТ бөлімшесі үшін тың жауапкершілік жүктемек. Бөлімшенің қозғалыс қауіпсіздігі бөлімінің бастығы Дәулет Сүлейменовтің айтуынша, қазіргідей астық және көмір тасымалы қызған шақта маневрлік тепловоздарға түсетін тапсырыс саны күрт артып, вагондарды дер кезінде жинап алудың өзіндік қиыншылығы туындайтын көрінеді. Әйтсе де, жаңадан жол салынып, желінің ұзаруы жұмыс көлемін де арттыратыны хақ.