Отандық рельстер төселуде

Жаңалықтар

20.01.2017, 10:26

Маңғыстау өңірінде биылғы қыс жұмсақ болып тұр. Сондықтан жолшылардың желтоқсанда басталған күрделі жөндеу жұмыстары 10 және 11 бекеттер арасында «Теміржол жөндеу» ЖШС-ның СМП Бейнеу филиалымен еш кедергісіз жалғасын табуда. Қазір 18,9 км бойына рельс бунақтары төселуде. Өндірістік-техникалық бөлім бастығы Бектөре Орысбаеваның айтуынша, биыл Өзен – Маңғыстау телімі бойындағы 20 км жол күшейтілген орта жөндеуден өтпек. Р43 типіндегі рельстер су жаңа Р65 типіндегі ауыр рельстерге алмастырылмақ. Сондай-ақ, рельс астындағы топырақты үйінділер орнына қиыршық тастар төселмек. Біз барғанда «Тамақ» бекеті мен 16 бекет арасындағы 391-392 шақырымда 40-қа жуық жол шаруашылығының мамандары қауырт жұмыс жүргізуде екен. Сом балға мен сүйменді құлаштай үйіріп, шойын жолдың тетіктерін босатып, ақаутапқыш техника мен құралдар көмегімен ақаулы рельстерді анықтап, жолды өлшеп-пішіп, жұмыла жұмыс істеп жатқан жолшылар шыңылтыр аяз болмаса да салқын да сызды ауа райының суықтығын елемей, сырт киімдерін шешіп тастап кіріскен. Екі шақырымдық жолға рельс төсеудің қамына кіріскен жолшылар ертеңгі болатын «толаскезге» дайындық үстінде екен. Маңғыстау жол дистанциясының №4 телім бастығы Тұтқабай Оңғаров жігіттердің жіті қимылын бақылап-басқаруда. ─ Ақтөбеден 2 шақырым рельс әкеліп, перегонға түсірді. Кеше 350 метр аудардық, бүгін жоспар бойынша тағы да осынша метр төсейміз деп отырмыз. Жалпы қазір қисық телімдердегі тозығы жеткен рельстерді тұтастай алмастыру жұмыстары жүріп жатыр. Жоспар 5,9 км. Ақтөбе зауытынан әкелініп, салынып жатқан отандық рельстер сапасы жағынан талас тудырмайды. Ара-тұра қар ұшқындап, күн суытқаны болмаса, қыстың қаһарына мінбей әлі де жаймашуақ мінез танытуы да бізге болысып тұр. Барлық жұмысты алдын ала дайындап алып, тек жолды аударып төсеу кезінде ғана «толаскез» алып, жұмысты кестеге сай жүргізіп жатырмыз, - дейді Тұтқабай Оңғаров. Жолшыларға «ЖЕЙСМАР» фирмасының жол техникалары мен станоктары үлкен көмегін тигізуде. Рельсті кесіп те тесіп, әрі болттарды бұрап, қатайтып, түзетіп, тегістеп, қысқасы рельс төсеуде қыруар жұмысты жалғыз өзі атқаруға қауқары бар станоктар жолшылардың қол жұмысын көп жеңілдеткен.

Отандық рельстер төселуде

Басқа да жаңалықтар

Қазақстан теміржолшысы газеті, №78 02 қазан 2026 жыл