Шымкенттегі станцияларда қауіп-қатердің алдын алуға арналған рейд өтті

Жаяу жүргіншілер темір жолда қауіпсіздік ережесін жиі бұзатын өңірлердің бірі – Шымкент қаласы. Мәселен, осы жылдың 4 айында 4 қайғылы оқиға орын алып, оның біреуі өлімге әкеп соқтырды. Басты себеп – тұрғындардың бейғамдығы.

Оның сыртында жыл басынан бері машинистер жолға адам шығып кетуіне байланысты 14 рет пойызды шұғыл тоқтатуға мәжбүр болған. Бұл жерде ескере кететін бір жайт, пойыз автокөлік емес, тоқтауы қиын. Тежеуішті басқаннан кейін бір шақырым жүріп барып тоқтауы мүмкін. Осыны кейде білместіктен, кейде біле тұра асығыстықтан немесе абайсыздықтан ереже бұзатындар аз емес. 

«Қазақстан темір жолы» компаниясы қомақты қаржы жұмсап, пойыз өтетін ауыл-аймақтардағы жолдарға қоршау орнатады. Соған қарамастан темір жол маңында тұратын тұрғындар, соның ішінде балалар да бар, өз өмірлерін қатерге тігеді. Онымен қоймай қоршау материалдарын ұрлап кетіп жатады. 

Темір жол – өте қауіпті аумақ. Ол титтей де болсын қателікті кешірмейді. Сондықтан темір жол ережелерін барынша сақтаған абзал. Шойын жолды жағалай қонған тұрғындарға осы қауіп-қатерді түсіндіріп, тәртіп бұзғандарды анықтау үшін темір жол қызметкерлері, әскерилендірілген темір жол күзеті және көлік полициясының өкілдері Шымкентте арнайы рейд өткізіп жатыр. Қарекеттің басты мақсаты – жазықтыны жазалау емес, қайғылы жағдайдың алдын алу.