Елордаға темір жол көлігімен 75 мың тонна көмір жеткізілді

«ҚТЖ-Жүк тасымалы» ЖШС және ИИДМ Индустриялық даму комитетінің өкілдері елорданың көмір тұйықтарында болып, қатты отынның бар-жоғын тексерді, деп хабарлайды Rail-news.kz.

Елордада өңірлік көмір операторлары тізіміне енген 11 көмір сатушы анықталды.

Өткізу пункттерінде көмір жеткілікті мөлшерде, машиналар тиелуде, ұзын-сонар кезектер мен дүрлікпелер жоқ. Жеткізіп беру құның есептемегенде көмір құны: Майкөбен разрезі – 12500 теңге, Шұбаркөл разрезі – 13800 теңге, Қаражыра разрезі – 14500 теңге.

«Бек-Айда» ЖК-нің көмір қоймасында жөндеу жұмыстары жүргізілген. Қойма бір уақытта 12 ашық вагонға дейін түсіруге қабілетті. Күн сайын 50-60 машина қатты отын шығарылады. Негізінен, бұл қоймада көмір сатып алушылар – қала, Талапкер, Қосшы және Қажымұқан кенттерінің тұрғындары.

«Өткен жылы күніне 150-200 көлік жөнелтіліп жатты, көмір доңғалақтардан түсірілмей жатып, бірден вагоннан сатылды, ұзын-сонар кезек болды. Қазір дүрбелең жоқ, мүмкін бұл адамдардың алдын-ала, жазда көмір қорын жинауымен, қаланы газдандыру жүргізілуіне байланысты да шығар. Тұрғындардың 50-60 пайызы көмір сатып алған. Вагондарды беру мен алып кетуде қиындықтар жоқ», - деді Көмір қоймасының меңгерушісі Дулат Құсайынов.

ИИДМ Индустриялық даму комитеті төрағасының орынбасары Тұрар Жолмағамбетовтың айтуынша, биыл халықты көмірмен қамтамасыз ету тактикасы өзгерді.

«Бұл аязды күтпей, тұрғындарды жылы мезгілде көмірмен қамтамасыз етумен байланысты, дүрбелең жоқ кезде бағалар да қолжетімді болады. Біз «Қазтеміртранс» АҚ вагондар паркін тек көмір тасымалдаумен ғана айналысу үшін қайта топтастырдық. Бұл ретте, ҚТТ вагондарына тарифтер нарықтық құннан 20-30 пайызға арзан», - дейді Т.Жолмағамбетов.

«ҚТЖ-Жүк тасымалы» ЖШС атқарушы директоры Вадим Копылов атап өткендей, жылыту маусымына дайындықтың 4 айында 1 мамырдан 31 тамызға дейін Нұр-Сұлтан қаласына 75 мың тонна көмір жеткізілді. Бұл көрсеткіш әкімдік мәлімдеген қажеттіліктен (37 мың тонна) екі есе жоғары. Қыркүйек айына коммуналдық-тұрмыстық қажеттіліктер мен тұрғындар үшін көмір өніміне қажеттілік жоспары 67 мың тоннаны құрайды. 12 қыркүйектегі жағдай бойынша бұл көлемнің жартысы қойылған. Орта есеппен тәулік сайын 45 вагон түсіріледі. Осындай қарқын сақталған жағдайда елордаға 90 мың тонна көмір әкелінеді.

«Қала көмірмен толық көлемде қамтамасыз етіледі. Алайда, көмірді тұтынушылар тек елорда тұрғындары ғана емес, қала маңы тұрғындары да болып табылады, сондықтан қажеттілік жоспарын қалыптастыру кезінде осы фактіні де ескеру қажет», - деді Вадим Копылов.

«ҚТЖ» ҰК» АҚ көмір тасымалын жедел штаб үйлестіреді. Жолдың әрбір бөлімшесінде мониторингтік топтар құрылған, олардың басты міндеті – тұйықтарда көмірдің бар-жоғын бақылау. Штаб отырысы күніне екі рет: таңертең - мемлекеттік органдардың қатысуымен, кешке - көмір разрездері өкілдерінің шақырылуымен өтеді.