ІРО бойынша ақпарат берілді
«Қазақстан теміржолшысы» газетінің тілшісі
«ҚТЖ» ҰК» АҚ Мәжіліс залында экономиканы мемлекет иелігінен алу бойынша Президент тапсырмасын жүзеге асыру аясында «ІРО туралы ақпараттық-түсіндіру» тақырыбында кездесу өтті.
Жиынға «Самұрық-Қазына» АҚ, «ҚазМұнайГаз» ҰК» АҚ және KASE, AIX сынды қор биржалары мен брокерлік-дилерлік ұйымдар өкілдері қатысып, ҚТЖ қызметкерлеріне «2021-2025 жылдарға арналған жекешелендірудің кейбір мәселелері туралы» ҚР Үкіметінің қаулысына сәйкес қаржылық сауаттылық пен инвестициялық мәдениетті арттыру бағытында ақпараттар берді.
– Бүкіл Қазақстанның өңірлерін қамтып, 7 қазанға дейін осындай ақпараттық-түсіндіру жұмыстарын жүргізудеміз. Бәріңізге сонау 1990 жылдардағы жекешелендіру бағдарламасы туралы мәлім. Ол кездегі жекешелендіру мақсаты – іс жүзінде жұмысын тоқтатқан көптеген кәсіпорындардың өндірісін қалпына келтіру болды. Қазіргі жекешелендіру барынша ашықтығы, айқындығымен және ел экономикасының нарыққа бейімделуімен ерекшеленеді. Жекешелендірудің бірнеше тәсілі бар, олар – ашық кезеңдік конкурс, аукциондық конкурс, электронды конкурс, тікелей атаулы сату және ІРО болып табылады, – деді «Самұрық-Қазына» АҚ өкілі Дамир Мамытов.
Кездесуге қатысқан теміржол қызметкерлері жиыннан қазіргі уақытта мән-маңызы зор мәліметтер алғанын атап өтті.
– Бүгін өте қызықты кездесу болды. «Самұрық-Қазына» өкілдері халыққа өте ұғынықты тілде ІРО туралы айтып берді. Осы бір жаңа қаржы құралы арқылы ақпарат бере отырып, теміржол саласы қызметкерлерінің қаржылық сауаттылығын арттырды. Жалпы ІРО – тұрақты даму деген мағынамен астарласып жатыр. Біздің компания да өзге ірі ұйымдар секілді осы даму жолына қадам басуда үлкен мақсаттарды көздейді. Бұған біз біртіндеп қадам басатын боламыз, – деді «ҚТЖ» ҰК» АҚ адами ресурстарды басқару департаментінің директоры Сәуле Истлеева.
– Мұндай жиындар өте пайдалы деп санаймын. Жалпы бұқара халықтың қазба байлығымызды ортақ пайдалануына мүмкіндік береді. Әріптестерге көп рахмет, өте түсінікті тілде ІРО саласының қыр-сырын айтып берді, – дейді «ҚТЖ» ҰК» АҚ Көпсалалы қызмет көрсету орталығының бас менеджері Жүніс Байтенов.