«Менің мамандығым – менің тағдырым» байқауы басталды
«Қазақстан теміржолшысы» газетінің тілшісі
«Қазақстан темір жолы» ҰК» АҚ-да Ұлттық компания мен оның еншілес ұйымдарының қызметкерлері арасында «Менің мамандығым – менің тағдырым» атты байқау басталды.
Байқаудың мақсаты – теміржол саласындағы үздік қызметкерлерді анықтау, теміржолшы мамандығын насихаттау, қызметкерлердің өзара қарым-қатынасын арттыру және еңбек мәдениетіне тәрбиелеу. Осы ретте, Компания қызметкерлерінің әрқайсысының жеке басының маңыздылығын, олардың Компания қызметіндегі және корпоративтік мәдениетін дамытудағы үлесін мойындау мақсатында бірқатар аталымдар бойынша жүлделер тағайындалып отыр. Атап айтсақ, «Идеалдарға адалдық» аталымы Компания құндылықтарын тарату және темір жолға көп жыл адал еңбек еткені үшін тағайындалса, «Бәрі де мүмкін» аталымы Компания үшін маңызды жобаны іске асыруға мақсат қойған қызметкерлерге берілмек. «Жан-жақтылық» аталымы байқау жеңімпазына кәсіби жетістіктері мен қоғамдағы белсенді ұстанымы үшін, «Ең мықты буын» аталымы кәсіби дағдыларды ұтқыр пайдаланғандар үшін, «Болмыстың жеңілдігі» аталымы Компания проблемаларын шешу үшін өз қасына әлеуметті белсенді адамдарды жинап, талантты ұйымдастырушы мен көшбасшы ретінде өзін көрсете білгендерге, ал «Күш – махаббатта» аталымы қоғам мойындаған және қайырымдылық қызметін ілгерілеткен, сондай-ақ адамды сүю мен мейірімділік танытқан жандарға тағайындалмақ. Ал «Орындауға шабыттандырады» аталымы үздік тәлімгерлерге берілмек. Байқаудың шарты бойынша байқауға қатысуға тілек білдірген үміткер бір ғана аталым бойынша қатыса алады.
Байқау кезінде қызметкерлердің еңбекке деген адалдығы, еңбек қорғау және қауіпсіздік бойынша жұмысты үздік ұйымдастыруы, Компания жұмысының тиімділігін арттыруда, пойыздардың қозғалыс қауіпсіздігін қамтамасыз етуде, әлеуметтік бағдарламаларды жүзеге асыруда, өндірістік және қаржылық-экономикалық көрсеткіштерді орындауда қосқан орасан зор үлестері, еңбектері есепке алынады.
Байқауға қатысушылардың жасына шектеулер жоқ, дегенмен Компанияда бес жылдан кем емес уақыт еңбек өтілі болуы тиіс. Байқауға қатысушы үміткер өтінім, түйіндеме, әртүрлі планда, электрондық форматта 4 дана суретін, бұқаралық ақпарат құралдарында шыққан жарияланымдарын, диплом, грамота, сертификаттарын, өз мамандығына деген махаббатын, мамандықты таңдаудағы себептерін, кәсіби жетістіктері мен нақты ерен еңбектерін ашып көрсететін эссе жазып және жұмыс орындарынан анықтама қағазын тапсырулары тиіс. Өтінім үміткерлердің өздерінен де, ұжымнан да қабылдана береді. Байқау екі кезеңнен тұрады. Бірінші кезеңде жұмыс органы тарапынан үміткерлерден келіп түскен материалдар мен өтінімдер қаралатын болады. Осы кезеңде тапсырған құжаттары байқау ережесі талаптарының үдесінен шықпаған үміткерлер автоматты түрде алынып тасталынады. Екінші кезеңде қазылар алқасы 2,3 орындар жүлдегерлері мен байқау жеңімпазын анықтайды. Байқауға өтінімдер 2023 жылдың 20 ақпанына дейін қабылданады.