«Жолаушылар тасымалы» АҚ паркі жаңа вагондармен толықты

Алматы станциясынан №77/78 «Алматы-2 – Маңғыстау»  жолаушылар пойызы құрамында Петропавл қаласындағы «ЗИКСТО» АҚ вагон жасау зауытында шығарылған жаңа вагондар жөнелтілді, деп хабарлайды Rail-news.kz.  

Вагон паркін жаңарту бағдарламасы аясында «Жолаушылар тасымалы» АҚ 400 орындық 11 купе вагон сатып алды. Вагондар Алматы – Маңғыстау және Алматы – Өскемен бағыттары бойынша жүреді.

Вагондар жайлы, техникалық артықшылықтарымен ерекшеленеді. Олар ауа баптау жүйелерімен, ауаны заласыздандыру және тазартуға арналған заманауи сүзгі, экологиялық таза дәретхана кешендерімен жабдықталған. Вагондарда заманауи бейнебақылау жүйесі бар: бейнекамералар дәліздер мен тамбурларда орнатылған және түрлі-түсті режимде жұмыс істейді. Түтін датчиктері бар өрт сөндіру жүйесімен, жеке өрт шлангісімен және әр вагонда су қорымен жабдықталған.

Жолаушылардың жайлылығы үшін әр купеде тоқ көздері және жолда ұялы телефондарды қайта зарядтауға арналған USB қосқыштары орнатылған. Вагондарда тоңазытқыш, микротолқынды пеш, ауыз су диспенсері және ыстық су титаны бар.

Вагондардың қызмет ету мерзімі – 40 жыл.

Жыл соңына дейін Қызылорда – Семей бағытында жүретін отандық өндірушінің купе және плацкарт үлгісіндегі тағы 50 жаңа вагонын жеткізу жоспарлануда.