Тәжірибе мен жұмыс тәсілін шебер үйлестіріп...

Жаңалықтар

09.06.2016, 17:05

Семей станциясының бастығы Ғабит Есқожанов жұмыс күні бір сағат бұрын басталады. Алдымен жол бөлімшесіне бас сұғып, станцияға қажетті құжаттар мен бұйрықтар, тапсырмалар болса танысып, әрі қарай станцияға бет алады. Мұнда алдымен бас сұғатыны – станция кезекшісінің жұмыс орны. Станция кезекшісі өткен тәуліктегі ахуалмен таныстырып, пойыздар қозғалысының схемасымен таныстырады. Станциядағы вагондар саны, жүк тиеу мен түсіру, маневрлік жұмыстар ретімен танысып шыққан соң ғана кабинетіне бет алады. Жолшыбай бүгінгі жұмыс жоспары да басында пісіп-жетіледі. Таңертеңгілік басқосуда орынбасарларынан бастап жауапты мамандар мен қызметкерлердің тәуліктік нормасын анықтап, тың тапсырмалар жүктейді... Семей станциясының бастығы болып тағайындалғанына аса көп уақыт өте қоймаса да, Ғабит Ғазизұлы осыған дейін бірталай жерде осы салада еңбек етіп, мол тәжірибе жинағандықтан жаңа жұмысқа тез бейімделіп, ортаға бірден сіңісіп кетті. Мұндағы жалпы ахуалмен танысып, қалыпты жұмыс ырғағына түскеніне екі айдан енді ғана асты. Қарапайым пойыз құрастырушысынан бастап, сатылай өскен кәсіби теміржолшы станцияның ішкі қызметін толық меңгерген. Қостанай және Алматы жол бөлімшелерінде еңбек еткен жылдары "Үздік станция бастығы"атағын екі мәрте алған мол тәжірибесінің арқасында, мұнда қазіргі күннің өзінде қауіпсіздік пен экономикалық көрсеткішті еселеуде тәп-тәуір жетістікке қол жеткізіп отыр. Станция жұмысының бұзылмай, кестеге сай ырғақты жүрісін қамтамасыз ету үшін жүк тиеу-түсіру цехы мен жедел өкім беру цехының жұмысын қатты қадағалайды. Станция бастығының бірінші кезектегі «бас ауруы» – бос вагондар мәселесі. Теміржолшылар үшін ең басты талап – вагон бос тұрмау керек, «дөңгелектер үнемі айналуда» болуы тиіс. Сонда ғана табыс тауып, жоспар орындалатыны әр теміржолшының жадында жаттаулы тұр. Станциядағы қат-қабат қауырт жұмыстармен қатар құжаттамалар мен келіп түскен бұйрық-қаулылардың кешіктірілмей рет-ретімен орындалуын қадағалау да бір міндет. Ал жұмыс күнінің соңы атқарылған шаруаларды ой елегінен өткізіп, қорытындылаумен аяқталады. «Не істелді, нендей іс жүзеге аспады? Станция басында қанша вагон неше тәуліктен бері бос тұр, қаншасы қандай бағыттарда аттандырылды. Локомотившілермен жұмыстың тиімділігі қандай? Алдағы жоспарға нені енгізу керек?» деген сауалдар арқылы есеп алу, ертеңін ойлайтын станция бастығының негізгі ұстанымы. Бұл Ғабит Ғазизұлының көп жылдық тәжірибесінен түйген жұмыс істеу тәсілі. Семей станциясында бүгінгі таңда 238 адам еңбек етсе, оның отыз пайызы жастар. Міне, осы өскелең буын өкілдерін «от пен суға салу» станция бастығының тағы бір қыры. Олардың жұмысын бақылап, кемшілігі болса өз қолымен түзеткізгенше қыр соңынан қалмай, қызметтік тұрғыдан сауалдар қойып, ортақ мәселені талқылауда жастардың пікірін тыңдауды жөн санайды. Дұрыс болса да, бұрыс болса да, әркім өз пікірі мен көзқарасын білдіруге міндетті деп үйретеді. Станция басшысының пікірінше, бұл қызметкердің кәсібилігін шыңдауда берері мол шара. –Қазіргі теміржолшы жастардың батылдығы мен білімге деген құштарлығы талас тудырмайды, тек оларды өндірісте жақсылап қайрап, шыңдау керек. «Станция кезекшісінің көмекшісі» атты сары мұқабалы кітап қолынан түспейтін бір жас жігітті сырттай бақылап, назарда ұстап жүрмін, болашақта мықты маман болады,– деп ойымен бөлісті жас теміржолшылардың тәрбиешісі Ғабит Есқожанов.

Тәжірибе мен жұмыс тәсілін шебер үйлестіріп...

Басқа да жаңалықтар

Қазақстан теміржолшысы газеті, №72 11 қыркүйек 2026 жыл