Ардагерге автокөлік сыйлады
Түркістан облысы бойынша меншікті тілші
«ҚТЖ-Жүк тасымалы» Шымкент бөлімшесі мен «Қазкөліккәсіп» ҚБ Шымкент филиалы басшылығы жуырда жүз жасқа толған теміржолдың жалғыз соғыс ардагері Қалмен Мұратұлын Жеңіс күнімен құттықтады.
Бадам елді мекенінде тұратын қарт майдангерді Ордабасы ауданының басшысы да құттықтай келіп, облыс әкімінің мерекелік сый-сияпатын табыс етті, сондай-ақ Қалмен қарияға су жаңа автокөлік сыйға тартты. Темір тұлпар қарияға өңірдегі қалталы азаматтардың сыйлығы екен.
Майдангер қария өзін мерекемен құттықтап келген азаматтарға көрсетіп жатқан ілтипаты мен қамқорлықтары үшін алғыс айтып, ақ батасын берді.
Қалмен Мұратұлы 1924 жылы өмірге келген. Соғысқа 1942 жылы 18 жасында аттанған. 1944 жылы Витебск қаласының маңында қолынан ауыр жарақат алып, госпитальге жіберілген. Елге екінші топтағы мүгедек болып оралған ол бірден еңбекке араласып, ұзақ жыл теміржол саласында жұмыс істеп, зейнетке шыққан.
Түркістан облысында бүгінгі таңда 2 соғыс ардагері мен 7 тыл ардагері және 14 ауған соғысының ардагері тұрады.