Бурабай курортына жолаушылар ағымы 30%-ға артты
Жазғы маусымның басталуымен Бурабай курортына пойызбен саяхаттау туристер мен жергілікті тұрғындар арасында бұрынғыдан да танымал бола түсті, деп хабарлайды Rail-news.kz.
Бурабайға маусым айында Ұлттық тасымалдаушының электр пойыздарымен 49 мыңнан астам адам тасымалданды. Бұл көрсеткіш өткен жылмен салыстырғанда 30%-ға жоғары, былтыр теміржол қызметін шамамен 34 мың жолаушы пайдаланған.
Жолаушылардың ыңғайлылығы үшін биыл Ұлттық тасымалдаушы «Қарағанды-Астана-Бурабай курорты» бағыты бойынша жоғары жылдамдықты №6811/6812 «Астана-Бурабай курорты» учаскесіндегі электр пойызының жүру уақытын 2,5 сағатқа дейін қысқартты. Электр пойызы аптасына бес рет: дүйсенбі, сәрсенбі, жұма, сенбі және жексенбі күндері жүреді.
Сонымен қатар, жазғы кезеңде №7509/7510 «Павлодар-Астана» жоғары жылдамдықты электр пойызының бағыты Көкшетау мен Бурабай курортына дейін ұзартылды (пойыз №6805/6806). Пойыз аптасына екі рет: жұма және жексенбі күндері жүреді.
Бұл шаралар Бурабай курортына жолаушылар ағымының артуына ықпал етті. Биыл Бурабайға теміржол көлігімен 125 мың жолаушы тасымалдау жоспарлануда.
Сондай-ақ, Бурабайға күнделікті №6829/6830 «Астана-Көкшетау» жүреді. Одан бөлек Астана-1 станциясынан №7553/7556, №6811/6812 «Қарағанды-Астана-Бурабай курорты» пойыздары және Нұрлы жол вокзалынан №7507/7508 «Астана-Көкшетау» пойызы қатынайды.
Жолаушыларға қолжетімді болу үшін электр пойыздарының билет құны 2 271 теңгеден 2 943 теңге аралығын құрайды. Билеттерді bilet.railways.kz сайтында және теміржол вокзалдарындағы «Жолаушылар тасымалы» АҚ кассаларында 10 күннен 1 күнге дейін сатып алуға болады.