Таразда ардагерлер ұйымы бас қосты
"Қазақстан теміржолшысы" газетінің Жамбыл облысындағы меншікті тілшісі
«ҚТЖ-Жүк тасымалы» ЖШС «Жамбыл ЖТ бөлімшесі» филиалының мәжіліс залында Тараз қалалық ардагерлер кеңесі мүшелері және бастауыш ардагерлер ұйымдары мен тұрақты комиссия төрағалары қатысқан семинар-кеңес өтті.
Семинар-кеңестің мақсаты – бастауыш ардагерлер ұйымы қызметінің мәні, құқықтары мен міндеттерін түсіндіру. Бұл туралы қалалық ардагерлер кеңесінің төрағасы Күләш Әбдікешова өз сөзінде айтып өтті. Сондай-ақ ардагерлер қоғамдастығының саяси-қоғамдық өмірдегі рөліне тоқталды.
Айта кету керек, қазіргі таңда Жамбыл облысы бойынша 48 мың зейнеткер есепте тұр. Олар 319 бастауыш ұйымға топтастырылған.
Семинарда сөз алған теміржол бастауыш ардагерлер ұйымының төрағасы Бауыржан Найманбаев Жамбыл филиалында атқарылып жатқан жұмыстар жөнінде баяндады. Теміржол көлік және коммуникация колледжі бастауыш ардагерлер ұйымының төрағасы К.Керменбаева болашақ мамандарды даярлау ісінде ардагер теміржолшылардың ролі туралы сөз етті.
Жиында бастауыш ардагерлер ұйымдарының төрағаларына алдағы есеп беру-сайлау жиналыстарын өткізуге бағытталған үлгі-нұсқа, іс-қағаздар папкасы таратылды.
Семинар-кеңес соңында қалалық ардагерлер кеңесінің төрағасы Күләш Әбдікешова теміржол саласының қалыптасуы мен дамуына зор үлес қосқан бір топ еңбек ардагерлеріне Алғыс хат табыс етті.