Вокзалда қоғамдық тәртіпті бұзған жас жігіт 20 тәулікке қамалды
Қостанай станциясындағы желілік полиция бөлімінің қызметкерлері теміржол вокзалын патрульдеу барысында қоғамдық тәртіп пен азаматтардың тыныштығын бұзған қала тұрғынын ұстады, деп хабарлайды Rail-news.kz.
Көліктегі полиция департаментінің мәліметінше, тексеру барысында жас жігіт вокзал қызметкеріне балағат сөздер айтқан. Сондай-ақ, ол полиция бөлмесіне жеткізу кезінде билік өкілдерінің заңды талаптарын орындамаған.
«Ұсталған азамат ұсақ бұзақылық жасағаны және құқық қорғау органы қызметкерінің заңды талабына бағынбағаны үшін әкімшілік жауапкершілікке тартылды»,—делінген хабарламада.
Қостанай қаласының әкімшілік құқық бұзушылықтар жөніндегі мамандандырылған сотының шешімімен құқықбұзушыға 20 тәулікке қамауға алу түріндегі әкімшілік жаза қолданылды.