Ұлы дала тарихы сыр шертеді
«Қазақстан теміржолшысы» газетінің тілшісі
Тәуелсіздік күні қарсаңында ҚТЖ-ның бас ғимаратында «Ұлы дала тарихының жазбаша мұралары» атты көрме ұйымдастырылды.
«Қолжазбалар және сирек кездесетін кітаптар» ұлттық орталығы бөлімінің бас сарапшысы Бақытжан Омарованың айтуынша, Түрік қағанаты, Қараханидтер мемлекеті, Алтын орда және Қазақ хандығы деп аталған төрт бөліктен тұратын көрмеге 20 жазба қойылған.
– Жұмыс жоспарына сәйкес біз әр ай сайын әртүрлі мекемелерге көшпелі көрме өткіземіз. Бүгін міне бір күндік көрмені Қазақстан темір жолының тапсырысымен әкеліп отырмыз. Мұнда қазақтың сонау Түрік қағанаты кезеңінен бастап кешегі төте жазуға дейінгі мағлұматтар алуға болады. Сонымен қатар кезінде басылып шыққан 76 мм шағын кітаптардың да түпнұсқаларын көруге болады. Кезінде А.Байтұрсынов араб әліппесіне реформа жасап, керек емес әріптерді алып тастады. Өзіміздің тіліміздің ерекшелігіне қарай 9 қазақша әріпті енгізді. Сонымен бізде төте жазу пайда болды. Қазіргі таңда Қытай, Иран, т.б. елдердегі қазақтар әлі де осы төте жазумен оқиды. Көрмеде елімізде пайдаланылған осы жазу тарихымыз туралы ақпараттар, ескі жазбалар қойылған. ҚТЖ басшылығы қолдау білдіргеніне алғыс айтамыз. Орталығымыздың тарихшылары, ғылыми бөлімнен жалпы 4 адам көрмеге қатысып, теміржолшыларға жазу мәдениетіміз туралы тың мәліметтер беруде. Өзіміз Ұлттық мұрағат ғимаратында отырамыз, тереңірек білгісі келетіндерді сонда күтеміз, – дейді бас сарапшы.
Тарихымызды кеңінен насихаттау мақсатында ұйымдастырылған көрме тағы да жалғасын таппақ.
