Көлік полицейлері теміржол оқиғаларын тергеу бойынша семинар өткізді

Бүгін ҚР ІІМ Көліктегі полиция департаменті «Қазақстан темір жолы «ҰК» АҚ оқу орталығының базасында «Темір жол көлігіндегі қылмыстар мен құқық бұзушылықтарға, оның ішінде есірткі мен киберқылмысқа қарсы іс-қимыл» тақырыбында практикалық оқу-жаттығу өткізді.

Семинарға ҚР Ішкі істер министрінің орынбасары Санжар Адилов, Көліктегі ПД басшылығы мен жедел-тергеу қызметтері, «ҚТЖ «ҰК» АҚ-ның өкілдері, сондай-ақ Астана қаласының жоғары оқу орындарының оқытушылары мен студенттері қатысты.  

Жиналғандардың алдында сөз сөйлеген С. Адилов ел Президенті Қ.К. Тоқаевтың ішкі істер органдарының алдына қойған басым міндеттеріне, атап айтқанда, криминалға қарсы іс-қимыл, бандитизмнің жолын кесу, қабылданған заңдардың мүлтіксіз орындалуын қамтамасыз етуге тоқталды. Ол Заң мен тәртіп қағидатын іске асыруды қамтамасыз ету тәртіп сақшыларының басты міндеті екенін атап өтті. 

«Тергеу жұмысы заңгерлер үшін «өмір мектебі», сондықтан біз өз өмірін құқық қорғау органдарымен байланыстырғысы келетін жастарды қызметке қуана қабылдаймыз», - деді Санжар Аскенұлы. 

Сонымен қатар, ол жоғары оқу орындарының  профессорлық-оқытушылар құрамына өз істеріне шынайы берілгендіктері, төзім мен табандылықтары  үшін алғыс білдірді.

Бұдан соң, Көліктегі ПД бастығының орынбасары Мәлік Қайбар теміржол және әуе оқиғаларына байланысты қылмыстық істерді тергеу бойынша аумақтық бөліністерден ерекшеленетін Көліктегі ПД-нің қызметіне тоқталды.  

Аталған іс-шара барысында тергеу басқармасының қызметкерлері студенттерге пойызбен қағып кету және кісі өлтіру фактісі бойынша оқиға орнын тексеруді дрондарды қолдана отырып, практикалық сабақ өткізді. Полицейлер тергеу бөлімшелері мен анықтау органдары қызметінің маңыздылығы мен қылмыстарды тергеудегі жаңашылдықтар туралы айтты. Олардың айтуынша, істі тергеу кезінде тергеуші болған оқиғаның шынайы бейнесін анықтауға міндетті. Оқиға орнын дұрыс тексеру қылмыстық іс бойынша дәлелдердің негізгі көзі және сәтті тергеудің кепілі болып табылады.

Өз кезегінде жедел-криминалистикалық басқармасының мамандары қылмыс іздерін анықтауға, алуға және тіркеуге арналған заманауи криминалистикалық техникалар мен құрылғыларды көрсетті. Ал кинологтар мен есірткі қылмысына қарсы іс-қимыл басқармасының қызметкерлері қызметтік-іздестіру иттерімен тыйым салынған заттарды табу бойынша және  киберқылмыстарының  зардаптары  жөнінде практикалық сабақ өткізді.

Басқосу соңында Санжар Адилов жоғары оқу орындарын бітіргеннен кейін еліміздің  ішкі істер органдарына қызметке келуге ынта білдірген бірқатар студентке шақыру қағазын берді.