ҚТЖ басшысы: Компания Әзірбайжанға астық жеткізуді 25 есеге арттырды
Бакуге сапар аясында «Қазақстан темір жолы» ҰК» АҚ басшылығы саланың жай-күйі мен даму перспективалары, ынтымақтастық мәселелері, жүк тасымалдау көлемін ұлғайту, инфрақұрылымды жаңғырту мәселелері талқыланған Тәуелсіз мемлекеттер достастығына қатысушы мемлекеттер Теміржол көлігі жөніндегі кеңесінің пленарлық отырысына қатысты, деп хабарлайды Rail-news.kz.
Отырыс қорытындысы бойынша ҚТЖ Басқарма төрағасы Талғат Алдыбергенов Әзірбайжан бұқаралық ақпарат құралдарына Қазақстан мен Әзірбайжан арасындағы темір жол қатынасын дамыту мәселелеріне түсініктеме берді. Ол соңғы 4 жылда Әзірбайжан бағытына тиелген және осы елден Қазақстан темір жолдары желісі арқылы қабылданған жүктердің көлемі 7 еседен астам өскенін атап өтті. Осы жылдың 10 айында бұл көрсеткіш шамамен 4,1 млн тоннаны құрады.
Айрықша драйвер – бұл транзит: Қытайдан ТХКБ бойынша 292 контейнерлік пойыз жөнелтілсе, бұл өткен жыл көрсеткішінен 12% артық. Сонымен қатар, Қазақстандағы рекордтық егіннің арқасында ҚТЖ Әзірбайжанға астық жеткізуді 25 есеге арттырып, қазірдің өзінде 600 мың тонна тасымалдады. Бұл компанияға ынтымақтастық қарқынын одан әрі барынша арттыруға мүмкіндік беретін берік іргетас.
Сонымен қатар, ҚТЖ басшылығы ТМД және Балтық елдерінің теміржол әкімшіліктері басшыларының отырысына қатысты, сондай-ақ «БКЛК – ЕТА» АҚ акционерлерінің кездесуі өтіп, онда компанияның стратегиялық даму векторлары қаралды. «Қытай – Еуропа – Қытай» маршрутының бәсекеге қабілеттілігін күшейтуге, контейнерлік тасымалдардың үлесін кеңейтуге, сондай-ақ Транскаспий халықаралық көлік дәлізі шеңберінде интеграцияланған мультимодальды шешімдерді енгізуге басты назар аударылды.
Тараптар серіктестікті нығайтуға, еуразиялық маршруттың тиімділігі мен тартымдылығын арттыруға бағытталған бастамаларды үйлестіруді және бірлесіп іске асыруды күшейтуге деген ортақ ұмтылысты растады. Қабылданған шаралар Азия мен Еуропа арасындағы транзиттік тасымалдар нарығындағы негізгі ойыншы ретіндегі БКЛК ЕТА позициясын одан әрі нығайтуға мүмкіндік береді.
