Отандық өнімдер қолданылуда

Жаңалықтар

10.04.2018, 12:19

Оқуға 2 мин

Маңғыстау магистральдық желі бөлімшесі ағымдағы жылы 72,6 км жолға күрделі жөндеу жоспарлауда. Межелі міндетті орындау барысында түбек теміржолына экологиялық таза, ең бастысы отандық жаңа материалдар қолданылмақ. Бұл қозғалыс қауіпсіздігін анағұрлым жақсартып, жұмыс сапасын бүгінгіден де арттыруға ықпал ететінін айтқан бөлімше директорының орынбасары Аслан Назаровтың сөзінше, биылғы жоспарға сай №5-6 бекет бойынша 103-129 км аралығындағы жол табаны күрделі жөндеуден өтеді. Құрылыс кезінде 26 км түйіспесіз жол, жаңа 47840 дана темірбетонды шпал, 75400 м³қиыршық тас-щебень салынады. 1 сәуір жағдайы бойынша, күрделі жөндеудің алғашқы 5,3 км салынып басталып, 9752 шпал, 15500 м³щебень төселген. Енді № 15-16 бекетте 352-377 км арасына 24,6 км түйіспесіз жол салынып, 45264 дана темірбетонды шпал, 71340 м³ щебень жайылмақ. Аталған жұмыстарды жүргізуші мекеме – «Integra Construction KZ» ЖШС Батыс, Солтүстік дирекциялары. – №15-16 бекеттегі құрылыс жұмыстары аяқталғаннан кейін №11-12 бекетте 22 км түйіспесіз жол, 40480 дана жаңа темірбетонды шпал төселіп, 63800 м³ қиыршық тас салынатын болады. Соның нәтижесінде жол жаңарып, пойыздардың қауіп-қатерсіз жүруіне мүмкіндік артпақ. Күрделі жөндеудің нәтижесінде ағаш шпалдары темірбетонды шпалдарға ауыстырылып жатыр, бұл дегеніміз – олардың қызмет көрсету мерзімі 3-4 есе жоғарылайды деген сөз. Түйіспесіз жолдың буынды жолдан ерекшелігі – түйіспелерге жұмсалған бекітпелер үнемді болады және пойыздардың жүрісіне де қолайлы. Құрылысқа «Казшпал» ЖШС-нің темірбетонды шпалдары, Ақтөбе қаласындағы «АРБЗ» ЖШС-нің түйіспесіз рельстері пайдаланылуда, – дейді Аслан Назаров.

Отандық өнімдер қолданылуда

Басқа да жаңалықтар

Қазір оқылуда

Қазақстан теміржолшысы газеті, №81 13 қазан 2026 жыл