Бұл атақты ПМС Шу...

Жаңалықтар

19.08.2016, 16:45

Қазақстанда ең ірі темір жол торабының бірінен саналатын Шу станциясында шоғырланған кәсіпорындар мен мекемелердің қатарында Жол машиналары станциясының жөні бөлек. Жол салудың шебері атанған отандық компания «Теміржол жөндеу» ЖШС-нің филиалы – «ЖМС Бірлік» кәсіпорны былайғы жұртқа «ПМС Шу» деген атаумен кеңінен таныс. Тарихқа үңілсек, бұл байырғы темір жол кәсіпорынының негізі 1944 жылы қаланып, әу баста Украинаның Дарцина қаласында өз жұмысын бастаған екен. 1972 жылы Шуға қоныс аударып, Бірлік ауылынан тұрақ тапқан. Басты міндеті – күрделі және орташа жол жөндеу, жаңа жол құрылысын салу. Содан бергі жарты ғасырға жуық уақыт ішінде Қазақстан темір жолында ПМС Шу жұмысшыларының қолы тимеген, техникасы бармаған түкпір қалмаған десек артық болмас. Бүгінгі күні кәсіпорынды «Теміржол жөндеу» ЖШС құрамында батыс айақтағы жолдарды салуда тамаша тәжірибе жинаған маман Сәкен Маратұлы Рахметов басқарып отыр. Ірі кәсіпорында бес цех: механикалық, құрылыс, буын құрастыру базасы, ауыр жүк машиналар цехы және әкімшілік басқарушы қызметкерлер бөлімі бар. Ауыр жүк машиналарының үлкен паркінде: LW 500F жүк тиегіш, TV 320 шебень-тас кесу, ЭЛБ-4 жол түзеу машиналары, КДКК-10 краны, хоппер-дозаторлық (ХДВ) және автокөліктер мен тракторлар бар, жалпы саны – 75 техника түрі шоғырланған. Қазіргі таңда олар Шу – Алматы-1 бағытындағы екінші темір жол телімін салуға атсалысуда. Оның арақашықтығы 60 шақырымды құрайды. Тамыз айының алғашқы онкүндігінде жол салу басталып, ағымдағы жылдың желтоқсан айында толықтай аяқтау жоспарлануда. Тамыздың бел ортасы ауса да, ми қайнатар ыстықта бір сәт те тыным алмастан темірдей шыныққан құрыш білекті жігіттер еңбек көрігін қыздырып жатыр. – Қазір салада жаңалық көп. Бұрындары темір жолдың астына ағаш шпал төселетін болса, бұл күні темір-бетонды шпал жасалуда. Мұның шыдамдылығы 5-6 жылға дейін жетеді. Ол өзіміздің Қазақстанда шығарылатын өнім, ал оны бекітетін құрал Германиядан әкелінеді, – дейді шпалдарды тігіп жатқан жұмысшыларға көмектесіп жатқан өндірістік база жетекшісі Біржан Тұрсымбеков.

Бұл атақты ПМС Шу...

Басқа да жаңалықтар

«Қазақстан теміржолшысы» газетінің 2025 жылғы 8 мамырдағы арнайы саны