Өтпедегі апаттың алдын алды

Өткел кезекшісі өткелде пойыз бен автокөліктің соқтығысуына жол бермей, тағы бір апаттың алдын алды. Оқиға Қарағанды мен Нұр-Сұлтан аралығындағы күзетілетін теміржол өтпесінде 11 желтоқсан күні 10 сағат 43 минутта орын алған.

Қарағандылық локомотив машинистері Вячеслав Козлов пен оның көмекшісі Мейрам Оханов кестеге сәйкес Алматы – Петропавл қатынасындағы №15 жолаушылар пойызын жүргізіп келе жатқан. Өтпе кезекшісі Болат Бекбергенов кенеттен дабылының түймешесін ағытып, машинистерге алдағы қауіп-қатерді ескертеді. Құрам өтпеден 200 метр қашықтықта жол үстінде жүк көлігінің кесе-көлденең тұрғанын көріп шұғыл тежегішті басып, автокөлікке жетер-жетпес пойызды зорға тоқтатып үлгереді. Абырой болғанда, қақтығыс орын алмады.

Белгілі болғандай, жүк көлігі өткел кезекшісінің ескертуін көзге ілмей темір жолдан өте шықпақ болған. Бірақ, қос рельсті жол үстіне шыққан соң техникалық ақауға орай кенеттен тұрып қалған. Өтпе бойынша кезекші оны көріп жалмажан келе жатқан пойызды тоқтатуға ұмтылған. Өткел кезекшісінің уақыт ұттырмай дер кезінде хабарлауымен Қарағанды локомотив пайдалану депосының локомотив бригадасы – машинист Вячеслав Козлов пен оның көмекшісі Мейрам Охановтың үйлесімді жұмысының арқасында пойыздың автомобильмен соқтығысуының алды алынды. Нәтижесінде пойыздың кешігуі екі сағатқа созылды. Ең бастысы бәрі аман.

Еске сала кетсек, 2019 жылы теміржол өтпелерінде 30 жолкөлік оқиғасы тіркелген. Олардың бәрінің бірден бір себебі – автокөлік жүргізушілерінің жол жүру ережесін өрескел бұзуынан болып отыр. Сондықтан «ҚТЖ-Жүк тасымалы» АҚ жүргізушілерді теміржол өтпелерінен өту ережелерін сақтауға және мұқият болуға шақырады.