Түрксіб темір жолының 90 жылдығына арналған кітап көрмесі
«Қазақстан теміржолшысы» газетінің тілшісі
Қазақ темір жолындағы ұлы құрылыс Түрксіб темір жолының 90 жылдығына арналған шаралар шеңберінде «ҚТЖ» ҰК» АҚ сайтында арнайы бөлімде кітаптар көрмесі ашылды.
Көрмеде Түрксіб құрылысы, қазақ теміржолдарының әртүрлі жылдарда қалыптасуы, атақты теміржолшылардың өмірбаяны, Түрксіб құрылысының басы-қасында жүрген танымал тұлғалардың еңбек жолдары, ұлы құрылысқа қосқан үлестері, ғылыми еңбектер, хроникалар, тағысын тағы әдеби кітаптар мен шығармашылық еңбектерді көруге болады.
Мәселен, 2006 жылы шыққан Қазақстанның атақты теміржолшысы Н.Есенғариннің «Хроника магистрали» деп аталатын кітабы Түрксіб теміржолының 75 жылдығына арналып, онда құрылыстың жоспарынан бастап жүргізілуі, Ұлы Отан соғысы жылдарынан теміржол жұмысы және Ақтоғай-Дружба телімінің салынуына дейін баяндалған.
«Бессмертный командарм Турксиба» деп аталатын кітабында Федор Осадчий қазақтың біртуар азаматы, қоғам қайраткері Тұрар Рысқұловтың көпшілікке беймәлім өмір жолын, Түрксіб құрылысындағы ерен еңбегін әңгімеге арқау еткен. Осы автордың «Великий творец добра и света» деп аталатын тағы бір кітабы – атақты инженер, Түрксіб құрылысының бас техникалық жетекшісі болған Мұхамеджан Тынышпаевқа арналған.
Түрксіб мерейтойына арналған кітап көрмесінен оқырман өзіне ұнаған дүниесін көшіріп алып оқуына болады. Барлық шығармашылық еңбектің астында аңдатпасы берілген. Өткенді білмей, келешек жоқ. Егер теміржолдың тарихынан сусындағыңыз келсе, railways.kz сайтындағы кітап көрмесіне кіріп, қалаған кітабыңызды көшіріп алып, білім көкжиегін кеңейтіңіз.