Сервистік қызметтің сапасы басты назарда

«ҚТЖ» ҰК» АҚ және «Самұрық-Қазына» ұлттық әл-ауқат қорының қолдауымен «Жолаушылар тасымалы» АҚ тұтынушыға тиімді қызмет ұсыну үшін жаңа жобалар дайындауда. «Жолаушылар тасымалы» АҚ бас директоры Питер Штурм Ақтөбедегі жұмыс сапарында алға қойған тиімділікті арттыратын міндеттермен бөлісті.

Ұлттық тасымалдаушы компания басшысының айтуынша, 2020-2029 жылдарға арналған жылжымалы жолаушылар құрамын жаңарту стратегиясының шеңберінде 469 жаңа жолаушылар вагоны және 26 вагонэлектростанция сатып алу жоспарлануда. 

Барлығы халықаралық талапқа сай. Сонымен қатар, 1000-нан аса жаңа дәретханалар модулін алу жоспарда бар. Сервистік қызмет алты айдың ішінде жоғары көрсеткішке қол жеткізеді. «Жолаушылар тасымалы» АҚ санаулы айдан кейін электронды түрде сауалнама жүргізу жұмыстарын бастауды жоспарлап отыр. Сауалнамаға кез келген адам қатысып, ұсыныс-тілегін жолдай алады. 

«Жолаушылар тасымалы» АҚ бас директоры Питер Штурм жұма күні Ақтөбедегі жұмыс күнін таңғы сағат 8:00-де бастап кетті. Алдымен теміржол вокзалының жұмысымен танысып, ондағы қызметкерлермен кездесті. Әрбір билет кассаларында отырған мамандармен тілдесе жүріп, ұсыныс-тілектерін тыңдады. 

Халықаралық тасымалдау саласында тәжірибесі мол бас директор сервистік қызмет көрсету сапасына, жолаушылар вагондарын жуу мен жинауға, төсек сапасына баса назар аударды. Жолаушылар тасымалында жақсы қызметке қол жеткізудің бір жолы сауалнама екенін, яғни жолаушылармен жиі сұрақ-жауап байланысын жүргізу арқылы тиімді басқаруға, сапалы қызмет ұсынуға болатынын жеткізді. 

Бизнес-процестерін жақсарту мақсатында жолаушылар арасында жиі сауалнама жүргізіліп, қателіктерді уақытында анықтап, шұғыл жұмыс жасаудың ерекшеліктеріне тоқталды. Және бұл мақсатта компания тарапынан жаңа жоба әзірленіп жатқанын да атап өтті. 

– Әр күн сайын пойыздағы қызмет сапасын жақсартуды ойлауымыз керек. Әр жолаушыға жағымды әсер қалдыруға тиіспіз. «ҚТЖ» ҰК» АҚ және «Самұрық-Қазына» ұлттық әл-ауқат қоры бізді қаржылай қолдауға дайын. Алдағы 5-6 айдың ішінде вагондардағы дәретхана модулі жаңартылады. Ақпараттық технологиялық қызметке инвестиция салынып жатыр. 

Мұның бәрі – біздің қызметті жақсарту үшін жасалып жатқан жұмыстар. Пойыздардағы сапалы қызметті бақылайтын арнайы бөлім құрылуы да мүмкін. Қызметкерлер қосымша оқытылатын болады. Қазіргі уақытта осы мәселені шешудің маңызды сұрақтарын жан-жақты қарастырып жатырмыз. Тоқтап қалмаңыздар, қорықпаңыздар, әріптестеріңіздің мүмкіндіктеріне, басшылық қолдауына сеніңіздер. Менің осында келгендегі басты мақсатым – компаниядағы қызмет сапасын жоғары деңгейге көтеру. Және оған сіздердің қолдау білдіретіндеріңізге кәміл сенемін, – деді Штурм өз сөзінде. 

Бас директор «Вагонсервис» АҚ-ның Батыс бөлімшесіне де бас сұқты. Ақтөбе, Орал, Атырау, Қызылорда, Ақтау және Түркістан телімдерін басқарып отырған филиалда жұмыс көлемі ауқымды. Цехтардың мүмкіндіктері мен техникалардың жарамдылығын тексерген Питер Штурм ақауларға қатысты талдама жасайтын мамандармен тілдесті. «Мәселен, жолаушылар тарапынан жиі сынға алынатын вагон есіктерінің жиі жарамсыз болуының себебі неде?» деген нақты сұрақтарымен кемшіліктерді жоюға қатысты ұсыныстарды тыңдады. Сервис қызметкерлерінің айтуынша, вагон есіктері көбіне жолаушылардың ұқыпсыз ашып-жабуынан, тұтқаға күш салуынан сынады. Және сынған бөлшекті ауыстыру үшін оған тапсырыс беру кезінде бірнеше құрылымның тексерісінен өтуі ұзақ уақыт алады екен. 

Басшылық тараптан жиі ауыстыруды қажет ететін бөлшектерге артығымен тапсырыс беру жағын қарастыру ұсынылды. 

Питер Штурм вагондарға тоқ беру жүйесін, доңғалақтарды, техникалық-материалдық жағдайды мұқият қарады. Сонымен қатар, мекемені өзге телімдерден ерекшелейтін цехтағы автоматтандырылған жуу қондырғысымен танысты. Мұнда тазалау кезінде жұмыс күші қолданылмайды. Көлденең және тігінен орналастырылған жуу щеткалары арқылы қас қағым сәтте бірнеше вагон жуылады. Бір күнде 50-60 вагон жуу мүмкіндігіне ие. 

Батыс аймақтағы жолаушылар тасымалын таза төсек-жаймамен қамтамасыз етіп отырған «Источник» ЖШС мекемесінің жұмысымен танысу кезінде төсек жаймаларының жуылуы, үтіктелуі мен бүктелуіне дейін мұқият назар аударды. Қазіргі уақытты мұнда бір күнде екі пойызға 6 мың комплект дайындалады екен. 

Бас директор жұмыс күнінің соңын «Батыс» жолаушылар тасымалы жөніндегі аймақтық филиалы мекемесінің басшылық құрамымен кездесумен аяқтады. Питер Штурм ішкі жұмыспен танысу барысында көп мәліметті назарға алғанын, Ақтөбе өңірінен алған әсері ерекше екенін жасырған жоқ. 

– Филиал жұмысымен танысу барысында команданың мықтылығына көз жеткіздім. Өз жұмысының қыр-сырын меңгерген тәжірибелі теміржолшылармен кездестім. Біз жолаушыларға қызмет көрсетуде жоғары сапалы қызметке қол жеткізу үшін бірқатар жобалар дайындап жатырмыз. Сондықтан бір мүддеге жұмылып, соны жүзеге асыруға күш салуға тиіспіз, – деген «Жолаушылар тасымалы» АҚ бас директоры жергілікті басшыларға филиалдар жұмысын тиімді және жүйелі жұмыс істеу үшін оңтайлы ұйымдастыруды, маркетингтік, коммерциялық және сервистік қызметті күшейтуді тапсырды. Қазақстан секілді мемлекетте теміржол саласының маңызы орасан зор екеніне тоқталды. Сондықтан алдағы уақытта көптеген ресурстарды тартуға күш салынбақ.