Ақтөбе рельс-арқалық зауыты өнімдерін Өзбекстанға нарығына шығаруға мүдделі
Ақтөбе облысы бойынша меншікті тілші
«Ақтөбе рельс-арқалық зауыты» ЖШС өткен айда Ташкент қаласында өткен экономикалық миссияға қатысты. Онда «Орталық және Оңтүстік Азия: аймақтық өзара байланыстар. Қиындықтар мен мүмкіндіктер» тақырыптары талқыланды, деп хабарлайды Rail-news.kz. Іс-шара қазақстандық экспортты қолдау QazTrade операторы мен Өзбекстанның Экспортты ілгерілету агенттігінің ұйытқы болуымен ұйымдастырылды. Көрмеге Қазақстаннан Ақтөбе рельс-арқалық зауытынан басқа 50-ден астам компания қатысты.
«Іс-шара аясында Қазақстан Республикасы мен Өзбекстан Республикасы арасындағы сауда-экономикалық қатынастарды дамыту мақсатында өзара тиімді ынтымақтастықтың болашағы талқыланды. Нәтижесінде, компаниялар арасында тікелей байланыс орнату, өзбек компанияларымен сауда қатынастарын жандандыру, сондай-ақ экономиканың түрлі салаларында екіжақты ынтымақтастықты нығайту және дамыту мәселелері жолға қойылды. Келіссөздер Өзбекстан кәсіпкерлерімен B2B кездесулері арқылы жүргізілді», – деп хабарлайды «Ақтөбе рельс-арқалық зауыты» ЖШС-нің баспасөз қызметі.
Зауыт Қазақстанның заманауи экономикасын қалыптастыруда елеулі рөлге ие. Республиканың орасан зор аумағын, көптеген өндіріс салаларындағы ауқымды жүк көлемдерін ескерсек, көліктің бұл түрі мемлекеттігіміздің негізгі тұғыры, оның бір өзі еліміздің өндірістік күшін тұтастай біріктіріп тұр. Алпауыт компания 2016 жылы пайдалануға берілді. Жылына 430 мың тонна өнім беретін Ақтөбе облысындағы рельс-арқалық зауытының Қазақстанда баламасы жоқ. Әлемде «МЕЧЕЛ» және «ЕВРАЗ» секілді ірі металл өндіретін алпауыт компаниялармен бәсекелес түрде рельс шығарып отырған кәсіпорынның өнімдері жоғары сапаға ие. Өндіріс ошағының жобалық қуаттылығы жылына 430 мың тонна. Отандық өнімді Қазақстан темір жолы тұрақты пайдаланып келеді.