5 айда қала маңы тасымалы 13% артқан
«Қазақстан темір жолшысы» газетінің тілшісі
Жыл басынан бергі бес айда «Жолаушылар тасымалы» АҚ «Қала маңындағы тасымал» филиалының жолаушылар айналымы өткен жылға қарағанда 13% өскен.
Жалпы, филиал тарапынан биылғы бес айда 66 бағдар бойынша жолаушылар тасымалы жүзеге асырылса, соның 61 бағдары қала маңы қатынасын, ал 5 бағдар жергілікті қатынасты құраған. Осы ретте, аталған филиалдың вагондарды жаңалау және бағдарларды дамыту бағытында біраз іс-шаралар атқарып жатқанын атар едік.
– Біз вагондарды жаңартуды кезең-кезеңмен жүргізетін боламыз. Келешекте 3 құрамды жаңартамыз, яғни 18 вагон сатып алу жоспарда бар. Алғашқы құрам немесе 6 вагонды 2022 жылдың соңына дейін сатып алу жоспарланған. Ал екінші құрамды, тағы 6 вагонды 2023 жылдың бірінші тоқсанында, үшінші құрамды, яғни соңғы 6 вагонды келесі жылдың екінші тоқсанында сатып алу межеленген. Бұл вагондар Нұрсұлтан-1 – Павлодар; Көкшетау – Нұр-Сұлтан-1 – Ерейментау; Нұр-Сұлтан-1 – Қарағанды бағыттарындағы вагондар паркін жаңартатын болады. Жолаушылар тасымалы негізінен жүрдек пойыздармен жүзеге асырылатындығын ескере отырып, хабтарды дамыту мүмкіндігі қарастырылуда. Осыған байланысты астаналық агломерация жағдайында жолаушыларды ірі станциялардан ұсақ елді мекендерге дейін жеткізуді қала маңындағы пойыздармен жүзеге асыру жоспарлануда, – дейді «Қала маңындағы тасымал» филиалының басшысы Сұлтан Табынбаев.