Туристер үшін Алакөлге дейін «Астана-Достық» пойызы іске қосылады

2023 жылы Алакөл бағытында Астана, Алматы, Шығыс Қазақстан және Абай облыстарынан 11 маршрут бойынша пойыздың жүруі жалғасады. Алғаш рет «Астана-Достық» бағытында «Тальго» пойызы іске қосылады. Бұл туралы «Жолаушылар тасымалы» АҚ Бас директоры Жәнібек Тайжанов жазғы маусымда жолаушылар тасымалын қамтамасыз ету мәселелері жөніндегі кеңесте мәлім етті. Аталған жиынға «Атамекен» ҰКП, туристік фирмалар мен салалық қауымдастықтардың, «Жолаушылар тасымалы» АҚ өкілдері қатысты, деп хабарлайды Rail-news.kz.

Өткен жылы Алакөл жағалауына теміржол көлігімен 243 мың жолаушы жеткізілгені атап өтілді. Еліміздің оңтүстік өңірінен үлкен ағын байқалды – 118 мың адам. Солтүстік аймақтан көлге және кері бағытта 72 мың жолаушы тасымалданса, ШҚО-дан – 52 мың. 2023 жылы жолаушылар орындарының санын 6%, яғни 276 мыңға дейін ұлғайту жоспарлануда.

Биыл туроператорлар үшін коммерциялық пойыздарға билеттерді ерте – пойыз жөнелтілгенге дейін 180 тәуліктен бастап брондау тәртібі  қолданыста болады.

Жәнібек Тайжанов «Жолаушылар тасымалы» АҚ әкімдіктермен, әуе компанияларымен және автотасымалдаушылармен бірлесіп Шымкент, Павлодар, Өскемен, Қызылорда қалаларынан Алакөл бағытында интермодальды тасымалдауды (көліктің екі немесе одан да көп түрімен тасымалдау) қалыптастыру мәселесін қарастыратынын атап өтті.

Кеңес қорытындысы бойынша интермодальдық тасымалдарды дамыту жөніндегі жұмыс тобы құрылады.