ҚТЖ-да Жамбыл облысының Қордай және Шу аудандарында ТЖ жағдайында Пойыздар қозғалысын үйлестіру бойынша жедел штаб құрылды
Ағымдағы жылдың 15 желтоқсанында Жамбыл облысының Қордай және Шу аудандары аумағында қатты жел мен аяздың салдарынан жергілікті ауқымдағы табиғи сипаттағы төтенше жағдай жарияланды. 13 желтоқсаннан бастап өңірде желдің 50 м/сек дейін күшеюі, боран, іс жүзінде нөлдік көріну, ауа температурасының күрт төмендеуі байқалды.
ҚТЖ-да ТЖ жағдайында Пойыздар қозғалысын үйлестіру бойынша барлық қатысы бар қызметтердің қатысуымен жедел штаб құрылды. Ауа райының қолайсыздығына байланысты және өңірдің теміржол учаскелерінде қозғалыс қауіпсіздігін қамтамасыз ету үшін пойыздардың қозғалыс жылдамдығына шектеу қою туралы шешім қабылданды. Осы бағытта жүретін жүк пойыздары уақытша тоқтатылды. Жолаушылар пойыздарын өткізуге басымдық беріледі. Жолаушылар пойыздарының қозғалысында қиындықтар бар. Өз күшімен темір жолдарды тазарту жұмыстары жүргізілуде, 150-ден астам адам жұмылдырылды.
Ауа - райының қолайсыздығы сыртқы электрмен жабдықтаудың ажыратылуына түрткі болды, бұл №41/42 Алматы-2 – Атырау Тальго жолаушылар пойызының электр энергиясын берудегі іркіліске әкеп соқтырды, соның салдарынан электровоз тез арада тепловозға ауыстырылды.
Ұлттық тасымалдаушы жолаушыларға тамақ ұйымдастырды.
Айта кетейік, 13-14 желтоқсанда Боранды станциясынан Шымкент және Түлкібас станцияларына дейінгі жолаушылар пойыздары ауа райының қолайсыздығынан автожолда тұрып қалған 300 астам адамды эвакуациялады. Мәселен, Шымкентке 240 жолаушы №33 «Алматы — Ақтөбе» және №77 «Алматы–Маңғыстау» пойыздарымен жеткізілді. Тағы 108 жолаушы №55 «Көкшетау — Қызылорда» пойызымен тасымалданды.
«Жолаушылар тасымалы» АҚ ауа райы жағдайлары жақсарғанға дейін пойыздар қозғалысының ықтимал кідірістері мен кестесіндегі өзгерістер туралы хабарлайды.
Жолаушылар «1433» тегін нөмірі және «KTZH_PP_BOT» Телеграмм боты арқылы жолаушылар пойыздарының кешігуі және тоқтатылғаны туралы ақпарат ала алады.