Бейнеулік вагон қараушы жүк пойызының автотіркегішінде ұзындығы 80 мм жарықшақ барын анықтады
Маңғыстау облысы бойынша меншікті тілші
Бейнеулік вагон қараушы қауіптің алдын алды. Қырағы вагон қараушы автотіркегіштен оңай байқала қоймайтын ақауды анықтап, қозғалыс қауіпсіздігіне төнген қатерді жойды. Вагондарға техникалық қызмет көрсету пунктінің вагон қараушы-жөндеушісі Мейрамбай Жариев станцияның 14-жолына келіп тоқтаған 3290 нөмірлі жүк пойызына қызмет көрсету кезінде 60707361 нөмірлі вагоннан тосын дыбысты байқап, тексере келе автотіркегіштен ұзындығы 80 мм жарықшақ тапты. Бұл Құлсары станциясынан Жаңа-ауыл станциясына жол алған, жүк тиеулі вагон болатын. Таяуда ғана, 25 қыркүйекте «Ибраев+К» мекемесінен деполық жөндеуден өтіпті. «Қазтеміртранс» АҚ-на тиесілі қазақстандық вагон.
– Мейрамбай Жариев жеті-сегіз жылдан бері жұмыс істеп келе жатқан, тәжірибесі толыққан вагон қараушы. Осы уақытқа дейін бұдан басқа да қауіпті ақауларды тауып, көзге түскен. Енді автотіркегіштің кіші тістеріндегі жарықшақты дер кезі байқап, жұмысына жауаптылығын тағы да дәлелдеп отыр. Егер ондай кемшілігі бар вагон әрі қарай да жүре бергенде жолда өздігінен ағытылып кетіп, апат болуы мүмкін еді, – дейді Бейнеу ТҚКП басшысы Нұралы Клычев.
Айта кетсек, бұл – Бейнеуде қазан айында тіркелген бірінші жағдай. Оған дейін тоғыз ай ішінде бейнеулік вагон қараушылардың назарына 23 вагоннан ақау табылған екен.